Аты алчыланы санында айтылгъанды

Кёп болмай Москвада «Родина» миллет арада «Ата журт – ол адамладыла. Саулукълу юйюрдю» деген форумда аналыкъгъа  бла сабийликге тутхучлукъ этиуге аслам эс бурулгъанды.  Къабарты-Малкъар бу жаны бла ахшы сынам жыйгъан алчы регионланы тизмесинде болгъанын да энчи белгилерчады. 

Жыйылыуну  РФ-ни Правительствосуну Председателини орунбасары Татьяна Голикова  башчылыкъ этген кесегинде КъМР-ни Перинатал арасыны баш врачы Гайыланы Алёна  багъыу махкамени  ишини юсюнден толу хапар айтханды.  Ол санда юйюрге болушлукъ тапдырыу хар жаны бла да бардырылгъанын   билдиргенди.  Сёз ючюн, тиширыу ана болургъа хазырланнган кезиуден  башлап къутулгъунчугъа дери болушлукъ тапдыргъанларын юлгюге келтиргенди.
Къабарты-Малкъарны Перинатал арасында жыл сайын 7 мингнге жууукъ  бала тууады.  Аланы араларында ауурлукълары 500 граммгъа жетмегенле да бардыла. Болсада мында ишлеген врачланы, медсестраланы билимлери, сынаулары да бийик болгъанларыны, тириликлерини  да хайырындан аллай къагъанакъчыкъла сау къаладыла. Жылны ичинде Перинатал арада ауурлукълары бек аз болуп 20-30 бала тууады. Бизни республикада аланы  80 процентини жашауларын сакъларгъа къолдан келеди.  Ол къыралда орта эсеп бла белгиленнген кёрюмдюден иги да мажалды.  Аны баш амадларындан бири ауурлукълары болгъан эм къыйналыргъа тюшген  тиширыуланы  заманында Перинатал арагъа тапдырылгъанларыды. Бийик медицина технологияланы хайыры бла ананы бла  баланы  саулукъларына  заран жетмезча мадар этиледи. Ол санда ана жарсымазча, жунчумазча психологиялы эм мультидисциплинар болушлукъ тапдырылады. 

Арада болжалларындан алгъа тууаргъа тюшген эм саулукъларында бир тюрлю кемчиликлери болгъан   сабийлени жашауларын сакъларча  да къыйын операцияла  бардырыладыла. Эсге сала айтсакъ, арт заманлагъа дери аллай операцияланы этер ючюн    федерал аралагъа жиберип тургъандыла.

Андан сора да, магъаналы шартладан бирине мында  кёп функциялы араны (МФЦ) «Мени биринчи документлерим» деген бёлюмю ачылгъанын санаргъа боллукъду. Аны хайыры бла анала юйлерине барыр кюнде тийишли къагъытларын бир жерде хазырларгъа эм къыралны жанындан къаллай болушлукъ этилгенини юсюнден да билирге боладыла.

Эсге сала айтсакъ, былтыр Перинатал арада  22 къагъанакъ болжалларындан алгъа ауурлукълары    бир килограммгъа жетмей   туугъандыла.