Ичги затланы къойгъан битеу санларына хайыр келтирликди

Быйыл 20-26 июльда Россейде мыйыны саулугъун сакълауну ыйыгъы  бардырылады. Мыйы адамны битеу санлары, чархлары бла байламлыды – ышаргъаныбыз, атлагъаныбыз, ингирде тынч жукълагъаныбыз, кюндюз тирилигибиз, хар оноуубуз да мыйыны ишине кёре къураладыла. Алай эсе уа, аны саулугъу, кемчиликсиз ишлегени артыкъда магъаналыды, деп ангылатадыла бизге КъМР-ни Саулукъ сакълау министерствосуну Психиатрияны бла наркологияны арасындан.

 - Клиниканы келечилери адамны мыйыны ишин бу затла бузгъанларын эсгертедиле:   аракъы бла наркотикле. Ала нейрон байламлыкъланы чачадыла, аны хатасындан а бир аз замандан неврология эм психиатрия ауруула башланырыкъларына къоркъуу уллуду,-дегендиле  бизге саулукъ сакълау учреждениядан.

Дагъыда адам къайгъырып турса, мыйы «къызгъан» этеди: жукълаялмайды,  тириликни тас этеди, гузаба болады. Жукълагъан кезиуде уа битеу санларыбыз солуп, жангыдан кюч аладыла. Кече заманында жукъламагъан мыйысына да тынчлыкъ бермейди.  

- Бу артыкъ къыйын болмагъан жорукъланы сакълагъан битеу санларына хайыр келтирликди: кюннге, бек аздан, 30 минут жаяу жюрюгюз. Окъугъуз, шахмат ойнагъыз,  тыш къыраллы тиллеге юйренигиз. Алай бла мыйы да жангыргъан этеди. Ичги затланы къойгъан а битеу санларына хайыр келтирликди,-дегендиле бизге клиниканы пресс-службасындан.