Бу операциядан сора кёп зат тюрленеди

Бир-бир операцияладан сора адамны халы хазна тюрленмейди. Алай башхала да бардыла, аладан сора сан-чарх башха тюрлю ишлейди. Аладан бири - ёт орунну кетериудю. Андан сора къаллай къыйынлыкъла келирге боллукъдула? Аланы болдурмаз ючюн не этерге керекди? Аны юсюнден врач Ахматланы Ахмат бла ушакъ этгенбиз.

- Аш орунну, чегилени ауругъанлары ёт бла байламлы болур?

- Хау. Кереклиси чакълы бир ётню бауур береди – ол ёт оруннга жыйылады, анда иги да кючленеди, адам азыкъ ашаса, сокъур чегиге барады. Адамгъа операция этилген  эсе – ёт орун кетерилген эсе, ёт бауурдан тюзюнлей чегилеге барады, ол себепден аны кючю да азаяды, къалгъан кючю уа ашны аз-аз ашасагъыз, аны эритирге жетерикди. Ол болумда адам кёп ашаса уа, аш  орун ауурланады, къусарыгъы келеди.

Андан сора да, ёт орун кетерилсе, ашны эритиучю ферментле да азаядыла.

- Ол болумдан къутулургъа уа не онгла бардыла?

- Баууругъузгъа сакъ болугъуз. Ётюгюзню кетергенден сора, сууда неда тылпыуда биширилген ашланы ашагъыз, бек игиси уа – аланы да тартылгъанларын ашасагъызды. Битеу къууурулгъан, жаулу, кючлю, тузлу ашланы баууругъузну ауругъаны сау болгъунчу къояргъа керексиз, эсиртиучю ичгилени да. Ол  аш орунну да, чегилени да жангы болумлада ишлерге юйретирикди. Жарым жыл озгъандан сора диетаны  кенгертирге боллукъду, ашха жемишлени, тахта кёгетлени (соханны, сарымсахны, турманы, лимонланы къошмай). Чабакъны, бир кесек этни къошсагъыз, аман болмаз. Алай эсе да, жаулары терк эримеучю ашланы – къой этни эм къуйрукъну, бек кючлю ашланы битеу жашауугъузда окъуна да бек аз хайырланыгъыз.

- Ашны къалай чайнаргъа керекди?

- Иги чайнагъыз. Азыкъ аш оруннга акъырын тюше барса, ферментлени «тирилтеди» эм бауургъа да онг береди «ишге» къатышыргъа.

- Ферментле ичерге да керекмиди?

- Хау. Ётню кетергенден сора, адамгъа жетишмеген ферментлени орунларына дарманла керек боладыла. Специалистге  соругъуз да, сизге керек болгъан дарманны хайырланыгъыз.

- Ёт орунда жангыдан ташла къуралыргъа боллукъмудула?

- Ётю болмагъан адамны чархында мындан ары таш къураллыкъ тюйюлдю деп айтыргъа жарамаз. Ташла ётню къурамы тюрлене неда ол чайкъалмай турса къураладыла. Жарсыугъа, операция окъуна  ётню къурамын тюрлендирмейди. Алай эсе, ёт барыучу тамырлада чайкъалмай тохтарыкъды.

- Андан а къалай бла азатланыргъа боллукъду?

- Ашны аз-аз, терк-терк ашагъыз. Хар ашагъаныгъыз ётню чыгъыууна себеплик этеди, алай не къадар терк-терк этилсе, ёт бир жерде уюмай, ол къадар турады, тамырлада жюрюй. Бек игиси - кюн сайын 5-7 кере ашасагъызды. Адам азыкъ ашаргъа жаланда эки-юч кере олтурса уа, ёт тийишлисича къатышырыкъ тюйюлдю аш орунну ишине.

Холестеринни хайырланыуну къоюгъуз. Ма  андан  къураладыла ташла. Семиз этни, сары жауну аз ашагъыз (сары жауну кюн сайын 20 граммын),  сютден этилген ашланы жаулары аз болгъанларын хайырланыгъыз.

Айланыргъа да кюрешигиз. Операция этилгенден сора бир бла жарым - эки айны ичинде кюн сайын отуз - къыркъ минутну жаяу айланыгъыз. Алай этсегиз, ёт бир жерде турмай, ишин эте барлыкъды. Сууда жюзюу да болушурукъду: суу санларыгъызгъа женгил массаж этерикди. Бассейннге ёт орунугъузну кетергенден сора жарым жыл озса, жюрюрге боллукъду. Эрттенлик гимнастика да хайырлыды. Аны уа хауада айланнганда этерге боллукъду. Къарын шаугютлени уа жылдан алгъа къатдырыргъа керек тюйюлдю.

- Чегиле къалай ишлерге боллукъдула ёт орунну кетергенден сора?

- Бу операциядан сора бир-бир адамла ичибиз ётеди неда къатады деп, тарыгъадыла. Аны баш сылтауу – иничке чегиледе бактерияланы мардадан кёп болгъанларыды. Къалынланнган ёт, ашны эритирге себеплик этгенден сора да, сокъур чегиде болгъан микробланы къырады. Бауурдан чыкъгъан ёт къарыусуз болгъаны ючюн микробла къырылмайдыла, кёпден-кёп бола, микрофлорагъа  заранлары тиеди.

- Сора не зат этейик?

- Ашыгъызны тюрлендиригиз. Татлы ашла микробланы кёбейлениулерине себеплик этедиле. Аланы орунуна наныкъланы, жер жилекни, зюдюрню, къара ишхилдини неда къара тукъузгюню хайырланыгъыз. Ала бактерияланы иги къырадыла – микрофлораны кереклиси чакълы бирде тутаргъа себеплик этедиле. Корица бла гвоздика да аллайладыла – алай эсе, аланы ашыгъызгъа оздурмай къошсагъыз да игиди.

Микрофлорагъыз тийишли ёлчемде болсун. Сизге бек керекдиле бифидо-лактобактериялары, аныча пребиотикалары болгъан затла.

Шёндю бактерияланы мардадан кёбейиулерин тохтатырча иги амалла бардыла, ол санда антибактериальный дарманла, антисептикле. Ала чегиледеги микробланы къырадыла, къаннга уа къошулмайдыла. Аланы кереклилерин а жаланда гастроэнтеролог врач айтырыгъына сёз да жокъду.