Кёк отлукъ бла байламлы иги кесек соруугъа къаралады

 Быйыл жылны башындан бери Нальчикде «Газпром межрегионгаз» биригиуню бир арасы кёк отлукъ бла байламлы 17 мингден артыкъ соруулагъа къарагъанды.

Орта эсеп бла алып айтханда, арагъа республиканы инсанларындан кюн сайын 350-ден аслам соруу келеди. Ала кёбюсюнде газ ызгъа къошулурча, техника документацияларын жарашдырырча, ремонт этерча, оборудованияларын алышырча, хайырланылгъан кёк отлукъ ючюн тёлеулени этерча эм билирча жумушла бла байламлыдыла.

Техника жаны бла бузукълукъну кетерирге керек болса, къысха заманда тийишли мадар этилирча операторла аварияла бла кюрешген службагъа билдиредиле. 

 Эсге сала айтсакъ, «Газпром межрегионгаз» биригиуню офисинде «къызыу ыз» да ишлейди. Бир тюрлю сорууу болгъан неда эсгертиу керекли ары бу телефон номерге сёлеширге боллукъду: 8-800-100-09-04.