Аманлыкъчы жууаплылыкъдан къутулалмагъанды

Кёп болмай «Россети Северный Кавказ»-«Каббалкэнерго» биригиуню специалистлери ич ишлени келечилери бла бирге майнинг бла кюрешип, токну урлагъан  шартны ачыкълагъандыла. Аны кезиуюнде жашау журтну подвалында тёрт блокда криптоволюта жыяргъа болушхан онсегиз аппарат табылгъанды. Саулай алып айтханда, аманлыкъчы 872 минг киловатт сагъат урлагъанды. Ахча бла алып айтханда, ол 3,3 миллион сомдан аслам болады. 

Сагъынылгъан  бузукълукъ бла аманлыкъчы бу жол экинчи кере тутулгъанды. Ары дери буруннгу жылда энергетиклени кючю бла анда 12 майнинг аппарт табылгъан эди. Ол заманда регионну сетьлерине 800 минг сом къоранч этилгенди. Болсада ол заманда Нальчикни шахар сюдюню оноу бла бузукълукъчу экинчи жылдан кеч къалмай, урлагъан электрокючню багъасын толусунлай тёлегенди.

Бюгюнлюкде сагъынылгъан шартла бла байламлы материалла ич ишлени органларына берилирча мадар этиледи. Анга РФ-ни Уголовный кодексини 165-чи статьясыны 1-чи кесегине  тийишлиликде (Алдап неда ышандырып мюлкге уллу къоранч салгъанлары ючюн) уголовный иш ачарча къарала турады. Алай бла ол эки жылны борчлу халда ишлерге, неда 80 минг сом тазир тёлерге керек боллукъду.

Майнинг бла кюрешгенлени хатасындан ток баргъан чыбыкълагъа бла подстанцияла уллу ауурлукъ бла ишлерге тюшедиле. Аны бла байламлы энергообъектледе аварияла болургъа, ёртенле къозгъалыргъа эм адамны саулугъуна, жашаууна да хата салырына къоркъуу чыгъады. Ол себепден «Россети Северный Кавказ» биригиуню келечилери аллайланы тинтирча дайым тийишли иш  бардырадыла.

Электрокючню сагъынылгъан шартла байламлы хайырланнганларына ишекли болгъанла «Россети» биригиуню «къызыу ызына» бу телефон номерге хакъсыз  эм аноним халда сёлешип билдираллыкъдыла: 8-800-220-0-220, неда (220).

Эсге сала айтсакъ, Россейни Правительствосу 2025 жылны 1 январындан 2031 жылны 15 мартына дери майнинг бла кюреширге жарамагъан регионланы тизмесин белгилегенди. Ол къауумгъа Къабарты-Малкъар да киреди.