Товар ючюн тёленнген ахчаны къайтарыр амал бармыды?

Качествосу осал болгъан товарны багъасын къайтарыргъа сюйгеннге закон бла неллай бир заман бериле болур? Кёпле тюкен аны багъасын тюз ары сёлешгенлей къайтарыргъа керек болгъан сунадыла. Ол а алай тюйюлдю.

Хайырланыучуланы эркинликлерин къоруулау жаны бла законда сатыучу алыучуну дауун дурус кёрюрча талай заман береди. Сёз ючюн, адам товарны тап тюрлюсюне алышыргъа сюе эсе – аны болжалы жети кюндю. Сатыучу товарны качествосун тинтирге сюе эсе уа, ол 20 кюннге жетерге боллукъду. Ахчаны къайтарыуну юсюнден айтсагъ а, анга     он кюн бериледи.

Сёз гарантия ремонтну юсюнден бара эсе, эки жаны да келишселе, ишни болжалын 45 кюнден артыкъ этер амалы жокъду. Сатыучу бу жорукъланы сансыз этсе, алыучу андан хар артыкъ кюн ючюн бир процент къошакъ тёлеригин излерге эркинди.

Тюкенде суратха тюшюрюрге жараймыды?

Анда аберини суратха тюшюрюрге чек салгъан закон жокъду. Алыучулагъа битеу информацияны ангылашыныулу, женгил окъурча халда басмаларгъа керекди. Розница тюкенледе товарланы сатыу-алыу бла байламлы жорукълада хайырланыучуну информацияны не тюрлю халда да алыргъа эркинлиги болгъаны чертиледи. Ол санда тюкенде суратха неда видеогъа тюшюрюп.

Алай тюкенни ичинде энчи отоулагъа уа, сёз ючюн, продукция сакъланнган жерлеге кирирге чек салыннган эсе, алада аберини суратха тюшюрюрге жарамайды, аны да эсде тутаргъа тийишлиди.

Алгъан затны багъасы юсюнде жазылгъандан башха эсе

Адам тюкенде абери алып, кассагъа келгенде уа аны багъасы юсюнде жазылгъандан башха болгъанын кёрсе, не зат этерге керекди?

Быллай затха тюбеген алыучулагъа тюкенледе асламысында «жангы багъаланы жазаргъа унутуп къойгъанбыз» дейдиле. Алыучуну уа товарны юсюнден хар нени, ол санда багъасын да билирге эркинлиги барды. Юсюнде не багъа жазылып эсе да, тюкен ма аллай бир тёле да ал дейди. Адам а анга кёре оноу этеди. Алай кассагъа жетип, андан башха ахча излегенлерин эшитсе уа, товарны ол биринчи багъасын тёлерге эркинди. Анга угъай деселе, ол да аны алмай кетерге боллукъду.

Алай тёлеп чыкъгъандан сора кёрсе уа башхалыкъны, артха кассагъа къайтып, ол алай нек болгъанын билирге онгу барды. Керек эсе, алайгъа тюкенни башчысын чакъырыргъа боллукъду.

Адамны жумушуна тийишлисича къарап, ыразы этмей къойсала, ол аны юсюнден алыучуланы оюмларыны китабына жазаргъа керекди. Ызы бла дау къагъыт жарашдырып, ол тюкеннге почта бла жиберирге. Анда анга кёз-къаш бермей къойсала  уа,  алыучу сюдге барыргъа эркинди.