Кесинге къайгъырыуну ахшы заманы

ВИЧ, СПИД, гепатит, сепсис эм башха жукъгъан ауруула наркотиклени ичгенлеге башхаладан кёп жагъыладыла. Ол а уулу затла адамны битеу санларын бузгъанлары, иммунитетни къарыусуз этгени бла байламлыды. Аурууланы кёбюсю ал кезиуде сезилмейдиле, аны хатасындан а аланы ачыкълау эм багъыу бютюнда къыйын болады. 

- Ууну ичгенден сора адам учунуулукъну, женгилликни сезеди. Алай бла уа кесин къалай жюрютгенин, не зат этгенин ангыламай къалады, уятлыкъ ишлени кёбюсю бу заманда этиледи, - дейди бизге КъМР-ни Саулукъ сакълау министерствосуну Психиатрияны бла наркологияны клиника арасыны психиатры-наркологу Марина Хакуашева. 

Ол ангылатханыча, бир шприц бла хайырланнганда, уятлыкъдан сора да, ВИЧ-инфекция жугъарыгъына къоркъуу уллуду. Аны бакъмаса уа, СПИД-ге ётерге болады. Ол заманда адамны санлары ауруулагъа къажау ахырда туралмайдыла.

- Бир ненча жыл мындан алгъа  СПИД-ден ауругъан наркоман «нёгерлери» бла бир шприцни хайырланнганы ачыкъланнганды. Андан сора уа кёплеге бу къыйын ауруу жукъгъанын тохташдыргъанбыз. Жарсыугъа, быллай кезиуле аз тюйюлдюле, - дейди нарколог. 

Наркоманияны багъыу къыйын ишди. Алай дарманла, психиатрны, наркологну, психологну болушлукълары бла бирге инсан кеси да сау болургъа итинирге керекди, ансыз медицина мадарла хайыр келтирлик тюйюлдюле, дейди ушакъ нёгерибиз. «Россейни Саулукъ сакълау министерствосу жукъгъан ауруулагъа къажаулукъну ыйыгъын бардырады, ол а кесинг ючюн къайгъырыргъа, наркотиклеге угъай дерге ахшы заманды», - дейди Марина Хакуашева.