Жаш къутхарыучуланы хазырлайдыла

Къабарты-Малкъарны Курортла эм туризм министерствосунда Орус география обществону «Альтаир» жаш тёлю биригиую къурагъан «Къоркъуусузлукъну школу» деген билим бериу проектни эсеплерин чыгъаргъандыла.

Башламчылыкъгъа къатышханланы министерствону туризмни айнытыу, курортла эм эркинликле бериу жаны бла бёлюмюню башчысы Виолетта Каскулова алгъышлагъанды. «Школда сиз теория билим алгъансыз, бек башы уа, аны артда керти болумлада бегите, башха адамла бла байламлыкъда ишлеяллыгъыгъызны, терк эм тюз мадар эталлыгъыгъызны кёргюзтгенсиз. Мында жыйгъан сынамыгъыз туризм бла къысха байламлыды, ол а школну бютюн сейир этеди, жолоучулукъларыгъыз сейир, къоркъуусуз да ётерлерини мурдору болады», - дегенди ол. 

Алай бла школну теория кесегинде жаш адамла Къабарты-Малкъар от тюшюуге къажау-къутхарыу службада биринчи болушлукъну этерге юйреннгендиле. Волонтёрла-къутхарыучуланы хазырлагъан араны таматасы Андрей Смолин анда баш инструкторну ишин тамамлагъанды. Ол жаш адамлагъа, мында юйреннгенлери аланы алда сакълагъан кёп билимни бир гитче кесеги болгъанын белгилеп, хар бири да жетишимлилик, жангы бийикликле эмда къоркъуусуз жолоучулукъла тежегенди.

Практика кесегине уа альпинист керек бла ишлеу, краеведение жолоучулукъла да киргендиле. Бийик усталыкълы къутхарыучуланы башчылыкъларында ала сууланы ётерге, кёлледе, черекледе ачыгъанлагъа биринчи медицина болушлукъну этерге юйреннгендиле.

Эсигизге салайыкъ, «Къоркъуусузлукъну школу» 2017 жылдан бери бардырылады, аны мураты сабийлени бла жаш адамланы къоркъуусуз жашау бардырыргъа, къыйын болумлада кеслерин тюз жюрютюуню жорукъларына юйретиудю. Школну бошагъанлагъа «Волотёрланы тюрлю-тюрлю къыйын болумлада ишлерге  юйретиу эм хазырлау» деген шагъатлыкъ къагъытла берилгендиле.