Урунуу китапла – электрон халда

2026 жылны аллындан башлап республикабыздан 11 мингден аслам инсан урунуу китапларын электрон халда алыргъа заявленияланы толтургъандыла, алай бла бу амал кийирилгенли аны бла 56 150 ишчи хайырланнгандыла.
Социал фондну республикада бёлюмюнде белгилегенлерича, адамны урунуу жолунда болгъан тюрлениуню электрон халда эсеплеу бусагъатдагъы излемлеге келишеди. Анда жазылгъан иги сакъланады – электрон документ тас болмайды, анда данныйлени бирси органлагъа ийгенде, халатла жиберирге къоркъуу иги да азды. Электрон урунуу китапда аны къагъыт тюрлюсюнде болгъан битеу жазыула бардыла: инсанны данныйлери, ол санда СНИЛС-и да, къайда эм къачан ишлеп башлагъаны, ишден чыкъгъаны, башха къуллукъгъа кёчгени, усталыгъы эм башхала. 
Андан данныйлени алыр ючюн, инсан энчи кабинетинде «Справкала бла выпискала» бёлюмге кирирге, анда уа «Электрон урунуу китапдан выписка», сора уа «Выписканы алыу» тизгинни сайларгъа тийишлиди. Документге электрон мухур салынады, алай бла аны юридический кючю къагъыт тюрлюсюне тенг болады. Къагъыт выписка керек болса уа, аны фондну жер-жерли бёлюмюнде неда МФЦ-да алыргъа жарарыкъды.