Жер-жерледе айбатландырыу эмда тапландырыу ишле

Нальчикде быйыл сквер-музей маталлы энтта да бир жангы парк къураллыкъды. Аны проектин былтыр битеуроссей конкурсда 11,5 минг чакълы адам дурус кёргендиле, деп билдиргендиле КъМР-ни Къурулуш эм ЖКХ министерствосундан.

Бу жамауат тийре сабий эмда жаш тёлю чыгъармачылыкъ Къаланы къатында ачыллыкъды. Алайда кёп тюрлю тапландырыу ишле бардырыллыкъдыла. Аланы кезиуюнде уа тереклеге тиймей, табийгъатны сыфатын да сакълап, дизайнерле, скульпторла жарашдыргъан тюрлю-тюрлю чыгъармачылыкъ затла орнатырыкъдыла. Тийрени шёндю тазалап, хазырлай турадыла. Бир-бир жерлеринде плитка салып, бордюрла да орнатып башлагъандыла. Хар нени да бу жайны ахырына бошаргъа таукелдиле.

Май шахарда майдан жангыртыллыкъды

Анда Медведев атлы орамда вокзалны аллында эски майданны тынгылы жангыртыргъа умут барды. Ишле «Жашаугъа инфраструктура» къырал проектни чеклеринде бардырыллыкъдыла, дегендиле республиканы Къурулуш эмда ЖКХ министерствосунда.

Майданны тапландырыргъа кереклисин шахарчыла кеслери белгилегендиле. Алгъаракълада бардырылгъан битеуроссей къол кётюрюуге къатышып, энчи аны ала сайлагъандыла. Ачыкъ айтханда, ол жер шахарны «къабагъы» болгъанын эсге алса, бу оноу тюздю, дерчады.

Алай бла ишле 1800 квадрат метрде бардырыллыкъдыла. Ол санда шинтикле, чыракъла, урнала орнатыллыкъдыла, башы жабылгъан жерле да къурарыкъдыла. Транспортну сакълагъан адамлагъа алайы шёндюден эсе аламат боллукъду. Ишлени быйыл бошаргъа керекдиле.