Фахмулары бла сейирсиндиргендиле

Россейни Аманлыкъчыланы терсликлерине жолукъдуруу жаны бла федерал службасыны КъМР-де Управлениясыны учрежденияларында тутулгъанланы араларында эм татлы аш хазырлагъанла ачыкъланнгандыла. Ол жаны бла эришиуле уголовно-толтуруучу системаны тыл бёлюмлерини 160-жыллыгъын белгилеуню чеклеринде къуралгъандыла. 

Эришиуге къатышханла  ашларыны татыуу, тыш сыфаты  эмда анга ат къурай билиулери бла  жюрини сейирсиндирирге керек эдиле.  Алагъа тутулуп тургъанлагъа кюн сайын аш этилген продуктладан аламат, болмагъанча татыулу ашарыкъла этерге тюшгенди. Аладан кёплери  миллет ашланы сайлагъанларын айтырчады.  

Алай бла биринчи жерге 5-чи номерли колонияны повары чыкъгъанды. Ол «Сосрукону кючю» шорпа, «Нартла» котлетле, хобустадан  бла чюгюндюрден салат, лёкъумла эм кертмеден «Кужыпс» деген  суусун этгенди. 

Экинчи жерге хобуста шорпа, тефтельле, татлы ашарыкъла эм алмадан суусун этип, 4-чю номерли колония чыкъгъанды. Ючюнчю жерге уа 1-чи номерли колонияны тахта кёгетледен шорпалары, грачкадан как бла люля эмда локъумлары бла кисель чыкъгъандыла. 

Хорлагъанла грамотала бла саугъаланнгандыла.