Болжалы бошалгъан счётчик жокъгъа саналады

 «Газпром межрегионгаз Нальчик» предприятияда айтханларына кёре, бизни республикада быйыл ючюнчю кварталда тинтилирге керек болгъан газ счётчиклени саны 3343 болады. Сёз мында адамланы юйлеринде кёк отлукъ неллай бир хайырланылгъанын тергеген приборланы юсюнден барады.

Аланы хар бирини да ишге жарагъан кезиую болады: ол асламысында 6-12 жылды. Заманы чыкъгъандан сора уа,  аны тинтирге неда жангысына алышыргъа керекди.

Болжалы жете тургъан приборлары болгъан абонентлеге аны юсюнден аллындан окъуна билдирип башлайдыла. Ала уа кёпге созмай, «Газпром газораспределение Нальчик» компанияны абонент службасына барып, ишин этерча заявление жазаргъа керекдиле. Алай этилмей къалса, компанияда быллай приборну кёргюзтюулерин аллыкъ тюйюлдюле, газны багъасын а нормативге кёре тергерикдиле.

Компанияны специалистлери газ счётчикни тешип, абонентге бергенлеринден сора, ол аны Къабарты-Малкъарда Стандартизация эмда метрология арагъа элтирге керекди. Аны адреси: Нальчик, Эльбердов атлы орам, 45. Анда аны тинтип, ишге жарагъанын бла жарамагъанын тохташдырадыла, тийишли къагъыт бла бирге иесине къайтарадыла.

Прибор тап ишлегеннге санала эсе, аны андан ары хайырланып турургъа жарайды. Кесине да тийишлисича пломба да салып. Алай болмаса уа,  аны орунуна жангысын орнатыргъа тюшерикди.

Алай бла бу ишни болжалына салмай этерге тийишлиди. Эм биринчиден, ол абонентни кесине керекди, дегендиле «Газпром газораспределение Нальчик» компанияда.