Жаш адамла бла ачыкъ эмда хайырлы сёлешиу

Газетибизни озгъан номеринде билдиргенибизча, КъМКъУ-ну Минги тауну тийресинде орналгъан окъуу-илму комплексинде кёп болмай  жаш тёлюню бирикдирир мурат бла къуралгъан «Халкъла аралы лагерь» тёрт кюнню ичинде ишлегенди. Аны республиканы Миллетлени ишлери эм жамауат проектле жаны бла министерствосу къурагъан эди. Ары чакъырылгъан сыйлы къонакъланы араларында «Ата журтну къоруулаучулары» къырал фондну КъМР-де бёлюмюню  таматасыны орунбасары, энчи аскер операцияны  ветераны  Чеченланы Эльдар, орус тарыхны бла маданиятны «Вече» биригиуюню таматасы Роман Литвинов, блогер Аслан Мазукабзов да бар эдиле.

Форумну чеклеринде тюрлю-тюрлю тюбешиуле  къурагъандыла. Аладан бири шёндю миллетлени ишлери эм жамауат проектле жаны бла министрни къуллугъун болжаллы халда толтургъан Гергъокъланы Джамбулат бла бардырылгъанды. Лагерьни ача, ол аны ишине къатышырыкъ жаш тёлюню быллай магъаналы эм хайыры уллу боллукъ форумну ачылыуу бла алгъышлагъанды.

- Биз  деменгили Россейни миллетлерибиз. Аны кючю, къарыуу да бизни бла байламлыдыла. Къыйын кезиуде бир бирге билеклик эте билиу бизни баш ышаныбызды. Ол а, сёзсюз, кючлю къыралны баш шартларындан бириди. Ата журтну сыйын кётюрюу, анга хайыргъа къуллукъ эте билиу а хар инсанны да халинде болургъа керекди, - дегенди Джамбулат Борисбиевич.

Дагъыда ол юйюр адет-тёрелерибизни сакълай билиуню магъанасы уллу болгъанын энчи чертгенди. Ата-анагъа хурмет этиу, алагъа къартлыкъларында къайгъыра билиу, ол затланы сабийлерибизге да ангылатыу – ма олду патриотлукъну баш жорукъларындан бири, дегенди.

Роман Литвинов а россейлиле болгъаныбызны баш шарты ол паспортда жазылгъан угъай, хар адамны да жюрегинде болгъан: «Россей – мени къыралымды эм манга аны къадары магъаналыды»,- деген сезимди. Бу сёзле жууаплылыкъ туудурадыла, Ата журтунга керек кюнде табылыргъа хазырлыгъынгы шартларыдыла.

Роман Анатольевич чертгенича, хар башламчылыкъны да тутумлу мурдору болмаса, ол оюлуп къаллыкъды.  «Бизни миллетде уа ол мурдор бир бирге хурмет эте билиудеди. Ансыз не менме деген къырал да бузуллукъду. Законлагъа, тамата тёлюге, урунуугъа, маданиятыбызгъа, адет-тёрелерибизге, бир бирибизни тилине сый бере билиудеди къыралыбызны кючю. Россейде 190 миллет жашайды бюгюнлюкде. Аланы араларында къаугъа къозгъалмай туруу а кёпню юсюнден айтады», - дегенди ол.

Чеченланы Эльдар а, кесини сынамындан юлгю келтире, окоплада кёп миллетли взвод бир юйюрге айланып къалгъанын белгилегенди. «Анда таулу, къабартылы, оруслу, татарлы жокъду. Анда сени окъдан сакъларгъа хазыр къарындашынг барды.  Ол затлагъа энчи юйретмейдиле. Ол бизни къаныбыздады. Мамыр жашаугъа къайтхандан сора да, аны юсюнден унутургъа жарамаз», -деп чертгенди Чечен улу.

Блогер Аслан Мазукабзов а жыйылгъан жаш тёлю бла бир тилде сёлеше эди.  «Социал сетьлени, тюрлю-тюрлю сабий оюнла болгъан платформаланы хайырлана,  бир къауумла  жаш тёлюню, ахча бла алдап, кеси жанларына тартып, жумушларын этдиредиле. Аланы асламы уа, законнга бузукълукъ этгенлерин толу сезмей, женгил ахчаны ызындан сюеледиле. Быллай ишлени ахырлары уа тутмакъ бла бошалгъанын барыбыз да билебиз»,-дегенди ол.

Гергъокъланы Джамбулат да, цифралы ара бла байламлы сорууда тохтай, хар адам да кесин сакълай билирге кереклисин айтханды. Керексиз ётюрюк, тинтилмеген информацияны жаймазгъа, экстремист халлы басмаланы, нацист белгилени жаратханларын билдириу да уголовный жуууаплылыкъгъа келтиредиле. Аны себепли хар инсан да иги сагъыш этерге керекди быллай затха тюбегенде.

- Сизни бир тюрлю бир экстремист халлы къауумгъа къошулургъа чакъыра эселе, мычымай аны юсюнден полициягъа билдиригиз. Жаланда биригип хорлаяллыкъбыз аллай аманлыкъчыланы, - дегенди ол. 
Эсигизге салайыкъ, бу жумуш Россейни халкъларыны бирлигини жылында бардырыллыкъ ишлени федерал  программасына киреди.