Россейни инсаны болургъа сюеди

ТАСС/Кавказ агентство МАХ-да каналында билдиргеннге кёре, Минги таугъа ёрлеген италиялы журналист Велимар Томович Россейни Президентинден къыралыбызны гражданствосун беририн тилегенди.

Европаны эм бийик таууну тёппесинде ол Россейни бла Италияны байракъларын жайгъанды эмда тилегин видеогъа алдыргъанды.

- Хурметли Владимир Владимирович! Мени атым Велимар Томовичди. Сизге тилегими тюз бусагъатда тёппесине жетген деменгили Элбрусну башындан айтама. Мен альпинист тюйюлме, италиялы жалынчакъсыз журналистме, бу къыйын ёрлеуню къыралларыбызны араларында шуёхлукъгъа жоралайма. Анга миллетле аралы дипломатияны белгисича къарайма, арабызда кёп италиячыла багъалы  байламлыкъланы бютюн къаты кючлерине ийнанама. Хурметли Президент, тёрели россейли тин хазнаны жюрегим бла ангылайма, мында жашагъан адамлагъа ыспас кёзден къарайма, кёп заманны кесими бу айтхылыкъ къыралны кесегича сеземе. Мында кесиме кёп тенг да тапханма, сёз ючюн, кёп болмай ётген Жаш тёлюню битеудуния фестивалында. Бу тилегими толтуруругъузну тилеп, Россейни чынтты гражданини болургъа кюрешириме сёз береме, - дегенди ол.