Газетге жазылыу иш – миллет магъаналы жумушду

Бу кюнледе 2026 жылны экинчи жарымына газетлеге бла журналлагъа жазылыу иш бошалгъанды. Аны эсеплери бизни кезиулю кере къууандыргъандыла. Бу жол да «Заманны» 1585 юйюр аллыкъды. Жылны биринчи жарымында уа газетни 1560 адам жаздыргъан эди. Республикалы «Кабардино-Балкарская правда» (1060), «Адыгэ псалъэ» (1073) газетле бла тенглешдиргенде уа, тиражыбыз иги да алгъа барады. 

Бу жол газетге жазылыу иш, башха кезиуле бла тенглешдиргенде, бир кесек къыйын баргъанды. Нек дегенде почтада ишлегенлени санын къысхартыу компания битеу къыралда да бардырылады. Ол жумуш бизни республикада да этиле турады. Жарсыугъа, арт кезиуледе газетни почтадан адамны юйюне тапдырыу жумуш хар жерде да тийишлисича тамамланмайды, деген хапарланы эшите турабыз.  Биз почтачыланы  барысы бла къысха байламлыкъдабыз, ала газетни магъанасын ангылагъан, иш кёллю, огъурлу адамладыла. Бюгюнлюкде чыкъгъан чюйреликлеге да къарамай,   буюрулгъан жумушну шарайыпсыз толтурадыла. Сау болсунла! Не десек да, окъуучуларыбыз бла арада байламлыкъны ала жюрютедиле.

Басмада электрон амалла мардасыз айныгъанларына да къарамай, тиражыбызны бютюн ёсерге себеплик этгенлени атларын сагъыныуну тийишли кёребиз.  Черек эм Элбрус районланы администрацияларыны башчылары Къулбайланы Аланнга бла Отарланы Мухтаргъа эм жыл сайын  газетге эс бургъан, аны бла байламлыкъ да жюрютген, чынтты шуёхубуз Байсыланы Харуннга, КъМР-ни Бийик-тау къырал табийгъат заповеднигини таматасы Асанланы Зейтуннга, Черек районда Халкъны социал жумушларын тамамлагъан комплексли араны таматасы  Улбашланы Алинагъа,  аны орунбасары   Улбашланы Келлетге  эм кёп башхалагъа уллу ыспас этебиз.

Почталаны таматаларына,  алада  ишлегенлеге  да, ол санда Гажонланы Асиятха, Темуккуланы Аминатха, Гасыланы Нафисатха, Бёзюланы Аминатха, Хибийланы Зухурагъа, Чочайланы Лейлагъа, Къулбайланы Мадинагъа, Шауаланы Сайхатха, Геккиланы Къанитатха, Байсолтанланы Лейлагъа, энчи Аккайланы Фатиматха, Атмырзаланы Даринагъа, Мамуколаны Назирге, Отарланы Рамазаннга, Тюбейланы Кларагъа, Балаланы Зухурагъа, Отарланы Зуриятха, Ногъайлыланы Мариямгъа, Элмурзаланы Абидатха, Маммеланы Мариямгъа, Таукенланы Сакинатха, Маммеланы Аминатха, Гыжгыланы Танзилягъа, Денисенко Анастасиягъа, Ёзденланы Азинатха, Ёзденланы Фатиматха  эм башхалагъа жюрек ыразылыгъыбызны билдиребиз.                      Атлары сагъынылгъанла, эллерибизде окъуучуларыбыз бла сёлешип, жазылыу ишни тири бардыргъанларын чертирчады.

Бу жол редакцияны коллективи да иги къошумчулукъ этгенди жазылыугъа. Чыгъарамчылыкъ иш бла кюрешгенле ючюшер, тёртюшер, бешишер, андан да кёп газет жаздыргъандыла. Ол башламчылыкъ коллективни бирикдиреди, башха жерледе ишлегенлеге юлгю кёргюзтгенча. Дагъыда редакцияда бир иги тёре барды: мында ишлегенле,  газетни къуру кеслерине жаздырып къоймай, эгечлерине, къарындашларына, башха жууукъларына, аланы окъутхан устазлагъа, эллилерине да жаздырадыла. Ол жаны бла Текуланы Хауаны, Мусукаланы Сакинатны, Жангуразланы Нажабатны, Кетенчиланы Зульфияны, Трамланы Зухураны, Байсыланы Марзиятны, Малкъондуланы Сакинатны белгилерчады.

 Бюгюнлюкде газетни тиражын сакълау, аны сайтын эм окъуучуларыбыз бла байламлыкъ жюрютген башха электрон амалларын айнытыу, анда ишлегенлени баш борчларындан бириди. Сау ёмюрден асламны ана тилибизде чыкъгъан изданиябыз халкъыбызны къыраллыгъыны магъаналы белгилеринден бири болгъанлай келеди десек, жангылмазбыз. Малкъар театрыбыз, «Балкария» къырал фольклор-этнография тепсеу ансамблибиз, «Минги-Тау» эм «Нюр» журналларыбыз да халкъны ёхтемликлеридиле, аланы сакълаугъа эм айнытыугъа къошумчулукъ этиу-ол барыбызны да борчубузду деп, алай къарайма бу магъаналы жумушха. Къырал бизге басмабызны айнытыргъа, саулай маданиятыбызны сакъларгъа аллай онг бере эсе, биз аны бла толусунлай хайырланыргъа нек ыйлыкъсынабыз. Адам санлары бизден кёп болгъан миллетлени аллай бай хазналары жокъду, кёбюсю термилген этедиле тюрсюнлю сабий журналланы бла газетлени чыгъарыргъа. Ол затланы унутмагъанлай, бу магъаналы жумушланы тамамларгъа жетгенде, хар бирибиз да къолубуздан келченча билеклик этерге керекбиз.

«Заманны» тиражына себеплик этгенлени атларын сагъыныргъа, ала ол жумушха таза ниетлери бла берилгенлерин, маданият хазнабызны сакъларгъа себеплик этген чынтты инсанла болгъанларын да белгилерге сюебиз. Шёндю  хар бирини къайда ишлегенин жазып чыгъаргъа бу материалда онг жокъду.

 Аналаны Алий, Махийланы Абдулла, Чепкенчиланы Расул, Беккиланы Мусса, Геграланы Азамат, Созайланы Алим, Зумакъулланы Джамиля, Байсолтанланы Инара, Кучукланы Руслан, Алтууланы Аслан, Ёзденланы Асланбий, Апсуаланы Арсен, Байзуллаланы Аслижан, Тохаланы Хыйса, Ахматланы Мурадин, Гасыланы Азамат, Гюлюйланы Руслан, Рахайланы Валера, Хочуланы Алим, Тилланы Айшат, Гемуланы Кемал, къарындашла Геграланы Азамат, Къанамат, Арсен эм башхала да иги къошумчулукъ этгендиле. Аланы хайырындан энчи аскер операциягъа къатышхан жашларыбызгъа, ветеранлагъа эм аскер борчларын толтура, жашаудан кетгенлени юйюрлерине газетни 100 -ден аслам экземпляры жаздырылгъанды. 

Газетни тилибизни айнытыугъа эм сакълаугъа уллу къошумчулукъ этгенин ангылап, тиражыбызны ёсерине къайгъыргъан, анга жыл сайын кертичилей къалып, жазылыугъа себеплик этген энтта да бир къауум жашыбызны атларын сагъыныуну тийишли кёребиз. Сюд приставланы федерал службасыны КъМР-де Управлениясыны таматасы Бауаланы Ахмат, Черек районну жоллагъа ремонт этген управлениясыны таматасы Чатталаны Марат, «Газпром газораспределение Нальчик» акционер обществону Черек районда бёлюмюню таматасы Шунгарланы Хасан, Черек эм Элбрус районланы полицияларыны таматалары Ёзденланы Ислам бла Байсолтанланы Къурман-Алий, Къашхатауну, Бызынгыны администрацияларыны башчылары Бийнёгерланы Даниял бла Чочайланы Зуфар, «Маяк» бла «Долина нарзанов» санаторийлени баш врачлары Мамайланы Галина бла Чапайланы Ибрагим, Элбрус районда электросетьлени таматасы Хапаланы Юсюп, Элбрус районну Халкъны социал жаны бла жалчытыучу комплексли арасыны таматасы Этезланы Мажит, Элбрус районну Урунуу, иш бла жалчытыу эмда социал къоруулау арасыны таматасы Мырзаланы Замрат, халкъыбыз, аны тили, тарыхы сакъланырына къайгъыргъанлары ючюн махтаугъа, хурметге да тийишлидиле.

Дагъыда Сотталаны Заур, Мамайланы Ильяс, Муртазланы  Лариса, Тотрукъланы Танзиля, Улбашланы Масхут, Ахматланы Мурадин, Гемуланы Исмайыл бла Кемал, Башийланы Аслан, Таукенланы Асият, Моллаланы Хамид, Мисирланы Даниял, Къарчаланы Магомед, Хучиналаны Алия эм башхала къайгъырыулу, чомарт да адамла болгъанларын кёргюзтгендиле, сау болсунла.

Предприниматель иш бла кюрешген жашларыбыз да юлюш къошхандыла газетни тиражына. Аланы бир къауумлары ишчилерине, башхалары жууукъ адамларына да иги кесек газет жаздыргъандыла. Заммаланы Магомет, Сардиянланы Хусейин, Цийкъанланы Зейтун, Гузойланы Харун, Ахметланы Назир, Байзуллаланы Аслижан, Мисирланы Мариям, Гасыланы Азамат да ырысхыларындан юлюш чыгъаргъандыла. Алагъа да хурметибиз уллуду.

   Алайды да, жазылыу иш жетишимли бошалгъанды. Аны бла байламлы сагъынылгъан эллерибизни жамауатларына, къырал ишни бардыргъанлагъа, сатыу-алыу бла кюрешгенлеге, предпринимательлеге эм кёп башхалагъа редакцияда ишлегенлени атларындан, кесим энчи да жюрек ыразылыгъымы билдиреме. Ала газетни тиражын кётюрюрге болушханлары бла халкъыбызны маданиятын, ана тилин сакълаугъа, тин хазнасын айнытыугъа да къошумчулукъ этедиле. Ол ишни тамамлауда газетибизни къаллай бир кючю болгъанын арсарсыз ангылайдыла. Ёмюрлери узакъ болсун, тутхан ишлеринден къууансынла!   

 Редакцияны юсюнден айтханда, аны коллективи,  окъуучуларыбыз бла байламлыкъны юзмегенлей, аланы оюмларын да эсге ала, мындан ары да ишибизни алай бардырыр умутдады.  Газет а юйюрлеригизге иги хапарла келтириучю болсун!