Юйюрге-ипотека каникулла

Юйюрде экинчи сабий тууса неда аны кеслеринде ёсдюрюрге тышындан алсала, ипотека каникуллагъа чыгъаргъа онг боллукъду. Тийишли законну кёп болмай Къырал Дума къабыл этгенди, деп айтылады РФ-ни Финансла министерствосуну «Мени финансларым» деген жарыкъландырыу порталында.

Законда айтылгъаныча, ипотека келишим ишлеген кезиуде, аны алгъан инсан, банкга барып, кесине льготалы заман излерге эркинди. Алай болур ючюн а, къолайлыгъы неда иш хакъы бла байламлы жукъ да билдирирге керекмейди, ол амал экинчи сабий туугъаны неда юйюр кесине аны алгъаны бла берилликди.

Ипотека каникулну эм узакъ болжалы 1,5 жыл бла чекленеди. Тенглешдирип айтханда, башха сылтаула бла аны мардасы жаланда алты айды. Дагъыда бир эсгертиу: сабийге жыл бла жарым толса неда аны тышындан алгъан кюнден башлап аллай бир заман озса,  ипотека каникул бошаллыкъды. 

Бу амалны жаланда бир кере хайырланыргъа боллукъду. Ол кеси да жангыз бир жашау журтха бериледи, кредитни багъасы уа 15 миллион сом бла чекленеди.

Каникулну кезиуюнде не тазир, не къошакъ тёлеу салынырыкъ тюйюлдюле. Банкда уа залогну сыйырыргъа неда поручительге сёлеширге эркинлиги боллукъ тюйюлдю. Алай 7-18 айлада уа кредит тёлеу ёсерге боллукъду.

Берилген заман бошалгъандан сора, ипотекасы болгъан адам аны алгъыннгы график бла тёлеп тебирерикди. Аны болжалы уа берилген каникулну заманы тенгли аллай бирге кёбюрек боллукъду.

Закон быйыл 1 сентябрьде ишлеп башларыкъды. Аны кючю ары дери алыннган ипотека кредитлеге да жетерикди.