«Спорт мени кесими къарыуума ышаныргъа юйретгенди»

Къол тюйюшден республика, округ, къырал даражалы эришиуледе бабугентчи Герийланы Руслан хорлагъанланы къауумуна дайым киргенлей тургъанды. Ол угъай, сермешлерин болжалдан алгъа хорлам бла аз кере бошамагъанды. Бийик усталыгъы, хорламгъа итиниулюгю ахшы эсеплеге да келтиргенди – анга Россейни спортуну устасы деген ат берилгенди, бусагъатда ол сабийлени жарау этдиреди. Бизни бла ушагъында ол спортха къалай келгенини, адамлада къаллай шартланы багъалагъаныны, муратларыны юсюнден айтханды.

Спортха сюймекликни анга атасы Герийланы Хусейн сингдиргенди. Хусейн тренерди, Бабугентде кёп жетишимли гёжефлени хазырлагъанды, спортха кёлю-жюреги бла берилген адамды. Ол элни къауумуну тутушуугъа бла къол тюйюшге юйретгенди, анда Руслан спортну бу тюрлюлерине тёрт жылны юйреннгенди. Бир кесек замандан а аскер къол тюйюшден секцияны ачханды, школну бошагъынчы жашы ары жюрюгенди. Студент заманында Нальчикде Руслан къол тюйюшге тренер Хачим Мамхеговха жюрюгенди, анда усталыгъын беш жылны ичинде ёсдюргенди. Къол тюйюшден округ даражалы эришиуледе кёп кере хорлагъанды, къыралны биринчилигинде «алтынны» тёрт кере алгъанды, кубокну къытханды, Россейни чемпиону болгъанды.

Эм магъаналы хорламыны уа Герий улу Россейни биринчилигинде биринчи кере алгъан «алтынын» санайды. Ол анга бек жууаплы эришиу эди, анга къатышыр ючюн арыгъыракъ болургъа да тюшгенди. Ол кезиуде юйде баня бар эди, эришиуге атланыргъа бир кюн къалгъанда,  аны кюйдюргенин да кюле эсгереди. Биринчиликде къытханында,  жангы даражагъа чыкъгъанын ангылагъанды.

Спортха Руслан жети жылында келгенди, аллай гитче жыл санда къыйын жарауну орунуна тенглери бла ойнаргъа да сюе болур эди. Алай жарау бек сейир кёрюннгенди, залгъа кесинден таматаракъла да келгендиле, ала, тренерле да гитчелеге иги болгъандыла.  «Сора  ол кезиуде, сабийликден болур, жараугъа оюннгача къарагъанма, залгъа заманымы зауукълу ётдюреме деп келгенме. Абаданыракъ болгъанда ангылагъанма бу ишни магъанасын, сора жарауума да жууаплы кёзден къарап башлагъанма»,- деп эсгереди ол.

Бийик билим алыргъа Къабарты-Малкъар къырал аграр университетге киргенди, анда «Землеустройство» жаны бла окъугъанды. Анда жарау этерча зал бар эди, жолгъа кёп заман къоратмазча, къатында общежитияда жашагъанды, алайдан залгъа жаяу бир-эки минутха жетерча эди. Спорт а окъуууна чырмау угъай, себеплик окъуна этгенди. Юйрениу-жарау этиу жыйылыугъа бир жары кетсе да, окъууунда артха къалмазгъа кюрешгенди.

Спорт бла кюрешиуню ахшы жанлары асламдыла. Аладан бири уа тенгле кёп болгъанлары. Русланны да кёп къыраллада танышлары бардыла. «Вузда залыбызда республикабызны жер-жерлеринден жаш адамла, студентле жыйылгъандыла, анда шуёхлукъ кёп адам бла болгъанбыз, бюгюн-бюгече да бир бирибиз бла байламлыкъны юзмегенбиз. Шуёхлукъ жюрюте билиу ол да насыпны бир тюрлюсюдю, анда тенгинге кертичи болуу, кёзбаулукъ этмеу, алдатмау бек уллу жерни аладыла. Спортда жетишимли болур ючюн а, бек алгъа, жарауну тынгылы этерге керекди. Къарыуунг таркъаймазча, кюнден-кюннге кюч ала барырча, бир кюнню да жараусуз ычхындырмазгъа. Экинчиси уа, итиниулюкдю, салгъан муратынга ажашмай, буюкъмай барыуду. Хау, аны ючюн бир талай затдан къуру къалгъанча да боласа, сёз ючюн, солургъа бош заманынг къалмайды.  Тюз ашау, заманында жукълау да магъаналыды да, низамны бузмаз ючюн а, психология жаны бла кючлюлюк изленеди. Спорт адамны эсин-ниетин кючлейди, кесини къарыууна ышаныргъа юйретеди. Жангызда кючлю болуу азды, инсан акъыллы, билимли болургъа да тийишлиди. Битеу бу шартла бирге инсанны кючлю этедиле. Аны ючюн мен спорт бла кюрешгенле билимли, адежли да болур жанлыма», - дейди ушакъ нёгерибиз.