РФ-ни Ара Банкы: аш-азыкъ бир кесек учуз болгъанды

Къабарты-Малкъарда быйыл май айда багъала, апрель бла тенглешдиргенде,  0,1 процент къошхандыла. Ол санда аш-азыкъ учузуракъ болгъанды, продовольствиягъа саналмагъан товарланы багъасы хазна тюрленмегенди, жумушла уа кёбюрек туруп башлагъандыла, деп билдиргендиле РФ-ни Банкыны бизни республикада бёлюмюнден.

Аш-азыкъ дегенде, бегирекда тауукъ жумуртхала учуз болгъандыла. Аны сылтауу баямды – жылны кезиуюне кёре ала кёбюрек болгъандыла. Дагъыда апрель бла тенглешдиргенде, бадыражанланы эмда нашаланы багъалары тюшгенди. Мында да кюн жылынып, тирлик кёбейип башлагъаны себеплик этгенди.

Тюрлю-тюрлю телерадиотоварла, связь средствола, электроника эмда техника да андан ары учуз бола барадыла. Банкны бёлюмюнде айтханларына кёре, ол сомну сыйы кётюрюлгени эмда кредит бериу азайгъаны ючюн болгъанды алай. Дагъыда, сатыучула къазауат этип, парфюмерияны эмда косметиканы учузуракъ берип башлагъандыла.

Жумушла дегенде уа,  бегирекда Къара тенгизни жагъасында солуу багъа болгъанды. Жай кезиуде ол жанына сурам ёсгенин эсге алсакъ,  ол да сейир тюйюлдю. Дагъыда тыш къыраллада солуу багъаракъ болгъанды. Сотовый связь ючюн а, операторладан бири кесини тарифлерин тийишдиргенден сора, азыракъ тёлерге онг чыкъгъанды.

Республикада жыллыкъ инфляция 4,8 процентди. Саулай къыралда кёрюмдю бла тенглешдиргенде,  ол андан азыракъды. Болсада Россейни Банкы аны андан ары азайтып, 4 процентге жетдирирге кюрешеди.