Ахшыны аты – ёмюрлюк

27-28 июньда «Гладиатор» спорт комплексде, Занкишиланы Казбекни хурметине аталып, 18 жыллары толмагъан дзюдочуланы араларында бардырылгъан битеу Россей эришиулени кезиуюнде аны къурагъанладан бири Черек районну администрациясыны башчысыны орунбасары Уяналаны Азретден хапар билгенбиз.

- Эришиуле экинчи кере бардырыладыла. Белгилисича, Занкишиланы Казбек Черек районну Огъары Жемтала элинде туугъанды, саулай къырал да бек иги спортчугъа санала эди,-дегенди Азрет, турнир кимни аты бла бардырылгъаныны юсюнден айта. – Ол Россейни дзюдодан жыйымдыкъ командасыны къауумунда он жылны ичинде эрише келгенди.

Эришиулеге Санкт-Петербургдан башлап Юг, Шимал-Кавказ федерал округлагъа дери да 250 жаш спортчу келгенди. Аладан сора да, Казбек бла бирге жыгъышып тургъан Олимпиада оюнланы, дунияны чемпионлары да. Турнир къуралыулу барырча, кёп иш тамамланнганды. Спортну бу тюрлюсю бла кюреширге онгла Огъары Жемталада, Яникойда, Нальчикде да бардыла, бир кесекден Хасанияда да боллукъдула. Дзюдону регионда айныгъанын быллай турнирле бир ненча болгъанларындан да билирчады. Бабаланы Къууанчны, Боташланы Хасанны хурметлерине аталгъан турнирлени энди кёпле биледиле. Занкишиланы Казбекни хурметине аталгъан турнир да алача белгили болуруна ышанабыз. Спортчула ауурлукъларына кёре юч татамиде жыгъышып башлагъандыла. Турнирни ачылыуу уа кюнню ортасында, битеу къонакъла келгенден сора болгъанды.

Спортчуланы, турнирге къараргъа келгенлени алларында сёлешгенле КъМР-ни Парламентини Председателини орунбасары, грек-рим тутушуудан Олимпиада оюнланы чемпиону Мурат Карданов, Черек муниципал районну жер-жерли администрациясыны башчысы Къулбайланы Алан, Россейни ич ишлерини КъМР-де министерствосуну башчысыны орунбасарыны къуллугъун толтургъан  Геграланы Марат, Занкишиланы Казбекни окъутхан устаз, класс башчысы Тетууланы Борис, «Бирлик» биригиуню таматасы Сумайланы Ахмат, бу эришиулеге келгенлеге жюрек ыразылыкъларын билдирип, жаш адамларыбыз Казбекча тынгылы спортчула болурларын сюйгенлерин чертдиле. Геграланы Марат а Занкиши улуну тренери Данил Воловичге саугъа бергенди.

Эришиуле эки кюнню ичинде баргъандыла. Кеси ауурлукъларында алчы жерлеге бу спортчула чыкъгъандыла: Идар Хачидогов (КъМР, 46 кг ауурлукъгъа дери), Амирлан Унежев (КъМР, 50 кг ауурлукъгъа дери), Илез Газдиев (Ингуш Республика, 55 кг ауурлукъгъа дери), Хусейн Гамзатов (Чечен Республика, 60 кг ауурлукъгъа дери), Кантемир Хуранов (КъМР, 66 кг ауурлукъгъа дери), Давид Бизиков (Шимал Осетия-Алания Республика, 73 кг ауурлукъгъа дери), Магомед Каралиев (Дагъыстан Республика, 81 кг ауурлукъгъа дери), Артур Техов (Шимал Осетия-Алания Республика, 90 кг ауурлукъгъа дери), Дмитрий Соломыкин (Санкт-Петербург шахар, 90 кг аслам ауурлукъда).