Даниялны кезиулю хорламы

Ингир къарангысында  кёрмей, уругъа тюшген пенсиячы тиширыуну ёлюмден къутхаргъан Атабийланы Даниялны юсюнден «Заман» газетде биз  алгъаракълада жазгъан эдик. Бюгюн а аны дагъыда бир  жетишими бла алгъышларгъа сюебиз.

Даниял Нальчикде 2-чи номерли лицейде окъугъанды. Ол билимли, кёп жаны бла да фахмулу жашды. Алгъаракълада уа ол мектепчилени араларында Миллет тинтиу университетни  «Экономиканы бийик школу» халкъла аралы бирге ишлеуню юсю бла бардыргъан «Высшая проба» деген битеуроссей олимпиадада хорлагъанды. Ол жетишими Даниялгъа Экономиканы бийик школуна  сынауладан ётмей кирирге онг бергенди. 

Терен билимин жаш дагъыда онбир жылны ичинде бек иги белгилеге окъуп, алтын майдалгъа тийишли болгъаны бла да кёргюзтгенди. Аны олимпиадалы жетишимлери кимни да сейирге къалдырады: 2026 жылда адабиятдан битеуроссей олимпиадада хорлагъанды, орус тилден бла географиядан эришиуледе сыйлы жерлеге тийишли болгъанды, адабиятдан Шимал-Кавказ олимпиадада биринчи жерге чыкъгъанды. 

Даниялны дагъыда Санкт-Петербургну, Москвада Россейни  къырал гуманитар, Екатеринбургда  Уралны федерал къырал университетлери бардыргъан даражалы  «Восточный вектор»,  «Изумруд»  олимпиадалада хорламларын эмда «Къабарты-Малкъарны акъыллы жашлары бла къызлары» деген телепроектге къатышып, сыйлы жерлеге чыкъгъанын да  белгилерчады.

Хунерли жашны дагъыда илмуда, спортда да жетишимлери бардыла. Ол искусстволаны школун, «Насып» тепсеу школну эмда «Бродвей» студияны  да айырмалы бошагъанды.  Абхазияда бардырылгъан халкъла аралы конкурсда  «Суратлау сёз» жаны бла эришиуде биринчи жерге чыкъгъанды.