Багъыуда табийгъат берген онгланы аяулу хайырланыргъа

Къабарты-Малкъарны Курортла эм туризм министерствосуну жыйылыуунда сёз табийгъат амалланы хайырлана, багъыуну къурауну юсюнден баргъанды, курортланы багъыу-саулукъ кючлеу хазналары да тинтилгенди. Анга республиканы санатор-курорт учрежденияларыны, сейирлери болгъан ведомстволаны бла органланы келечилери къатышхандыла, жыйылыуну курортла эм туризм министрни орунбасары Асланби Шхагапсоев ётдюргенди.

Энчи эс саулукъну кючлеуде бла багъыуда табийгъат амалланы хайырланыугъа медицина направленияланы бериуге, жер тюбюнде гара суула къаллай бир къалгъанын билирча керекли къагъытланы жарашдырыугъа бёлюннгенди. Аны бла байламлы ведомствону туризмни айнытыу эм эркинликле бериу жаны бла бёлюмюню башчысы Виолетта Каскулова законодательствода болгъан тюрлениуле бла шагъырей этгенди, Курорт фондну бир къырал тизмесине шёндюгюлю эсеплени болжалдан кеч къалмай кийирирге да чакъыргъанды.

СКФО-да федерал илму-клиника араны Медико-биология бёлюмюню башчысы Юлия Корягина табийгъат багъыу амалланы хайырланырча медицина къагъытла къалай берилгенлерин ангылатханды. Ызы бла министерствону, санатор-курорт, медицина учрежденияланы араларында байламлыкъланы жюрютюуню амаллары тинтилгендиле.