Къысха чамла

— Алахха шукур, энди машинаны уручула алып кеталмазча аллай мадар табылгъанды дейдиле.

— Не мадарды ол? Дунияда болмагъан сейир кирит этген болурла алимле.

— Угъай, бош затды ол, бир къыйынлыгъы, ауаралыгъы да жокъду. Тюз да уручу, машинаны эшигин ачханлай, машина чач-тюк болуп къалады.

* * *

Бек бийикде олтургъан къуллукъчула шёндюгю адамны къылыгъы бек тюрленнгени бла байламлы кенгеш бардырадыла. Кенгешни бардыргъан тамата, жыйылгъанлагъа айланып:

— Шёндю таза ниетли адамны сатып алыргъа боллукъмуду? – деп сорады.

— Угъай, – дейдиле бир аууздан жыйылгъанла, – сатып алыргъа боллукъ тюйюлдю, сатаргъа уа жарайды.

* * *

— Ол эрменли бла чюйютлю сюдлюк болуп айланнганларында,  иш не бла бошалгъанын билемисе?

— Прокуроргъа он жыл бергендиле.

* * *

Эки татлы тенг сёлешедиле. Аладан бири уллу къуллукъда ишлейди.

— Ишчилеге тёлерге ахчам жокъду, ала уа ишге тохтамай келип турадыла. Мени борчум а ёседен-ёсе барады. Мен не этейим, башым хайран болгъанды?

— Муну аллай бир несине жарсыйса! Ишге хакъ тёлетип алсанг, эрттен сайын ала бек терк азайырла.

* * *

—Тюнене мен сени юй бийченг бла театрда кёргенимде бек къууаннганма, алай а сейир да этгенме. Тюрленнгенсе, шуёхум, чынтты юйюрлю кишиге ушайса энди. Юй бийченги кёрсем,  махтамай къоймам сени.

— Угъай, маржа. Андан эсе мени да махтама, ы-ы… театрда мени кёргенинги юсюнден  да зат айтма.

* * *

Эки татлы нёгер тюбешедиле. Аладан бири бизнесменди.

— Билемисе, бизнесменле ох этип жашайдыла дегенликге,  башынг къуру - да ауара болгъанлай турады, — дейди бизнесмен нёгерине. — Мындагъы фирмаларымдан сора Москвада да ачханма бирин. Жашым Америкагъа, къызым а Турциягъа кетгендиле.  Тыш къыралда болмаса мында окъургъа жарамагъанча. Алагъа къаллай бир ахча кетеди дейсе? Тюнене уа жаш солургъа келаллыкъ тюйюлме деп сёлешгенди да,  юй бийчеми уа аны ючюн башы тутханды. Биз юйюрюбюз бла быйыл Гонконгга барып солуюкъ деп тура эдик да, юйдегибиз а жаш бизни бла келалмазлыгъын билгенден сора, башы тутуп къалгъанды. Мен къуруда кесими юсюнден айтып турама, сен кесинг а къалайса?

— Билемисе, юч кюн болады мен аш кёрмегенли…

— Ашаргъа керекди, шуёхум, ашаргъа. Кёлюнг бармай эсе да, ашагъан эт, ансыз жарамайды. Хайда, сау къал, мени нёгерлерим былайда ресторанда сакълап турадыла.

* * *

— Жалан аякълай айланнган бек игиди дейдиле саулукъгъа.

— Тюз айтаса, шуёхум. Мен эрттенликде чурукъларым бла аякъларымда тургъанлай уянсам, башым чачылып кетеди дерча ауруучуду.

* * *

Бахчаларында кюреше тургъан эки къоншу тиширыу сёлешедиле.

— Э, къыз, тюкеннге бир иги бодуркъула келтиргендиле, дейдиле. Барып бирерин алырмы эдик?

— Неге керекди ол манга, мен кесим къуруда бахчада турама сора уа!

* * *

Тиширыу автобусха минеди да, шинтикледе къуру эр кишиле олтургъанларын кёреди.

— Мында чынтты эр киши жокъмуду? — деп сорады тиширыу, биреулен жер берсе эди деген умут бла.

— Чынтты эр кишиле уа топпа-толудула, бош жерле жокъдула ансы, — дейди эр кишиледен бири.

* * *

Эки турист къонакъ юйге келедиле. Аны иеси туристлеге бек кирли отоуну кёргюзтеди.

— Жаланда буду бош, — дейди ол.

— Ненчады багъасы бу тонгуз орунну? — деп сорады туристледен бири.

— Бир тонгузгъа 50 минг, эки тонгузгъа 80 минг, — деп жууаплайды къонакъ юйню иеси.

* * *

Жазыучу къоншусу бла уллу ушакъгъа кетип, жюрегиндегин айтады:

— Билемисе, мен къалай сюеме Нобельни саугъасын алыргъа!

— Сен а жазгъан эт, — дейди къоншусу.

— Кимге?

* * *

Генерал жангы туудугъу кимге ушагъанын билир ючюн адъютантын больницагъа иеди.

— Сизге ушайды, — деп къууанчлы ышарады къайтып келген адъютант.

— Ма санга! — деп къууанады генерал. — Хар нени да жик-жиги бла хапарлачы, энчи не затлары ушагъанын айтчы.

— Туудугъугъуз сизге ушаш чачсызды, жаланбаш, семиз, быдыры да бери чыгъып, бир зат да ангыламайды, кеси уа къуруда къычыргъанлай турады…

* * *

Пиллени юсюнден бек иги китапны ким жазарыкъды деп битеудуния эришиу къуралады. Немислиле ючтомлукъ илму иш жазадыла, атына уа «Пиллени юсюнден илму иш» деп атайдыла. Америкалыла уа «Америкалы пиллени юсюнден не зат билирге керекди» деген китапчыкъны чыгъарадыла. Болгарлыла — «Болгарлы пил — совет пилни кичи къарындашыды», дейдиле. «Пиллени бла чюйютлени проблемалары» деген китапны уа чюйютлюле жазадыла. Россейлиле уа — «Россей — пиллени ата журтларыды» эм «Совет пил дунияда бек акъыллы пилди» деген илму ишлени чыгъарадыла.

* * *

Москвагъа Хонеккер келеди.

— Леонид Ильич, манга Сталинни къабырын кёргюзтсегиз эди, — дейди ол Брежневге.

— Ким Сталинди ол?

Алай бла Хонеккер тилегин юч-тёрт кере къайтаргъанды.

— Къайсы Сталинди ол? — деп къойгъанды дагъыда анга Брежнев. Тилеги толмай, Хонеккер Германиягъа кетеди. Аны ашыргъандан сора Громыко Брежневге:

— Сиз анга анча кере тилегенде, ол къабырны нек кёргюзтмегенсиз? Эшта, Хонеккерни кёлюне тийген болур, — дегенди.

— Ким Хонеккерди ол? — деп сейирсиннгенди Брежнев.

* * *

Америкалыла Суздальдагъы тюрмени кёрюрге сюйгенлерин билдиредиле. Тюрмени таматалары кёп заманны унамай тургъандыла, алай ахырында, амал табалмай, аны пионер лагерьнича кёргюзтюрге оноулашхандыла. Тюрмедегилеге къысха кёнчекле кийдирип, пионер галстукла къысадыла. Америкалыла быллай пионерлени кёрюп  сейир-тамашагъа къаладыла.

Ненча жыл болады? — деп сорады аладан бири.

— Онбеш, — деп жууаплайды тюрмедегиледен бири.

— Мен а сизге 40 жыл берлик эдим, — дейди американлы.

— Сен неле жаншайса? — деп ачыуланады тюрмеде ишлеген. — Бизде тюрмеде турургъа аллай бир жылны бермеучюдюле.