Тохтаргъа кеч тюйюлдю

Жаш адамны аллында кенг жолла ачыладыла: билим алыу, чыгъармачылыкъ, юйюр къурау, жарыкъ сезимле, нёгерле бла тюбешиуле… Быллай толу жашау ючюн биз къолдан келгенни этебиз.

 Алай жарыкъ умутланы, муратланы бир терс атламны хатасындан чачаргъа боллукъду – наркотиклени. Ала адамны саулугъун осалгъа бургъанлары бла къалмайдыла.  Наркоман жууукълары бла байламлыкъланы тас этеди – жылыулукъну орунуна ётюрюк, алдау келедиле. Ол жамауат жашаудан бир жанында къалады, нёгерлери анга болушалмай кеси аллына къоядыла.

- Наркотиклени ичген адамны саулукълу юйюрю боллукъ тюйюлдю. Уулу затла эр кишини, тиширыуну да саулукъларын бузадыла, аны хатасындан сабийсиз къаллыкъларына къоркъуу уллуду,-дегендиле бизге КъМР-ни Психиатрияны бла наркологияны клиника арасыны пресс-службасындан.

Алай тюз  жашаугъа къайтыргъа кеч бир заманда да болмайды. Жаш заманда санланы тазаланыргъа къарыулары энтта барды, жаланда кесинге заманында бакъдырыргъа керекди, дегендиле бизге клиникадан.