УФСБ: Ётюрюклери ючюн – тутмакъгъа

Россейни ФСБ-сыны КъМР-де Управлениясыны къуллукъчулары, РФ-ни Ич ишле министерствосуну Шимал-Кавказ федерал округда Баш управлениясыны келечилери бла бирге экономикада бузукълукълагъа къажау излеу-тинтиу жумушланы кезиуюнде коммерциялы организацияладан бирини эки ишчисини хыйлалыкъларын тыйгъандыла.

УФСБ-ны пресс-службасындан бизге билдиргенлерича, ишеклиле Нальчикде инсанланы шахарны ичинде транспортда жюрютюу бла байламлы инфраструктураны жангыртыу жумушланы тамамлагъанларыны юсюнден жалгъан документле хазырлагъандыла. Алай бла къыралгъа 7,7 миллион сом къоранч салыннганды. 

РФ-ни УК-сыны 159-чу статьясыны 4-чю кесегине бузукълукъ этилгенлери бла байламлы терслеу иш ачылгъанды. Законлада белгиленнгенича, быллай аманлыкъ этгенни эркинлиги он жылгъа дери сыйырылыргъа боллукъду.