Губула кенг жайылгъан кезиу

Быйыл къышны хауа болуму  бла байламлы губула февральны ортасындан тирилип тебиреген эдиле. Андан бери республикада медицина учрежденияланы аладан ачыгъан 374 адам жокълагъанды. Аладан 192-си акъылбалыкъ болмагъанладыла. Былтыр сагъынылгъан кезиуде къуртла 469 адамны къапхандыла, ол санда 191 сабийни. Насыпха, биринде да жукъгъан ауруу ачыкъланмагъанды, деп билдиргендиле Роспотребнадзорну КъМР-де бёлюмюнден.

Эсге сала айтсакъ, бизни республика конго-къырым геморрагия безгек (КГЛ) жайылыргъа къоркъуулу жерге саналады. Ол саулукъгъа уллу заран салгъан, бирде ёлюмге да келтирген аурууду. Кёбюсюнде губу къапхандан сора жугъады, алай аны къол бла эзгенде да хата жетерге боллукъду. Андан сора да, аладан боррелиоз, энцефалит дегенча ауруула да жугъарларына къоркъуу барды.

Къуртла кёбюсюнде бийик ёсген ханслада бла юлкюледе кечинедиле. Аладан жаныуаргъа эм адамгъа ёрлерге да тынч болады. Ала кюн салкъында эм чегет жерледе тирилирге ёчдюле.

Аны себепли табийгъатха чыкъгъан кезиуледе акъсылдым эм узун женгли  кийимле киерге кюрешигиз. Аланы юсюнде губу иги эсленеди. Башыгъызда да бёрк неда къалпакъ болса да игиди. Бир зат жаймай хансха олтурургъа неда жатаргъа жарамайды. Бир жерге ишекли болсагъыз,  акъсылдым быстырны алып, хансны юсю бла ётдюрсегиз, олсагъат окъуна  губула къонмай къаллыкъ тюйюлдюле. 

Заранлы къурт-къумурсхаланы къурутур ючюн, хар замандача, билим берген учрежденияланы, санаторийлени, стадионланы, паркланы, медицина организацияланы тийрелеринде эмда башха жерледе дарман чачдырылады.

Бир тюрлю сылтау бла губу къапды эсе, эм игиси аны врачха барып чыгъарсады. Кеслери мадар этгенле уа башын анда къоймазгъа кюреширге керекдиле. Губу  жабышып тургъанны кёргенигизлей, мычымай медицина учреждениягъа барыгъыз. Алай этсегиз, аурууланы къозгъагъан микробла кёчерге жетиширик тюйюлдюле. Бек игиси  травмпунктха барсагъызды. Ол кече-кюн да ишлейди. Аллай амал жокъ эсе уа,  къатыгъызда поликлиникада тийишли болушлукъ тапдырлыкъдыла.

Врачха жетерге бир тюрлю онг болмаса уа, губуну кесигизге кетерирге тюшерикди. Аллай кезиуде «Ручка-лассо» неда «Клещевёрт» инструментле иги болушадыла. Алай сынам кёргюзтгенича, кёпледе аллай затла табылмайдыла. Аны себепли къурт кирген жерде терини жукъа халы бла къысдырып, ашыкъмай чыгъарыргъа керекди. 

Аны чыгъаргъандан сора, мияла оруннга салып, Гигиена эм эпидемиология араны лабораториясына элтип, конго-къырым геморрагия безгек болгъанын бла къалгъанын тинтирге берирге керекди. 
 Аны адреси: Нальчик ш., Байсолтан улу атлы орам, 33, телефону: (8662) 74-28-28.