Сыйырыргъа керекмейди, алай болжалла уа салыгъыз

РФ-ни Саулукъ сакълау министерствосу 15 - 21 июньда  телефон, социал сетьле, компьютер адамны саулугъуна салгъан хатаны азайтыугъа жоралагъанды. ⠀

Бизни республикада бу жаны бла болумну юсюнден Психиатрияны бла наркологияны клиника арасыны медицина психологу Инна Лысакова айтады: ⠀

- Бирле телефонсуз болалмай къалгъандыла, аны къолдан кетермейдиле, бир жерде унутсала уа,  къайгъылы боладыла, сабийле уа ачыуланып, тюйюшюп окъуна тебирейдиле.

Былайда   сабийлени юслеринден энчи айтыргъа сюеме. Аланы саулукълары, психика айныулары ючюн ата-анала жууаплыдыла. Ол себепден баласы Интернет ненча сагъат хайырланнганын, телефонда къаллай бир заманны ойнагъанын сюзюп турургъа керекдиле. Былайда аны къолундан кюч бла сыйырыгъыз демейме, ол бютюнда хата келтирликди. Алай болжалла салып, аланы толтуруруна къаты болургъа тийишлиди.

Бирде ата-анала кеслери терсдиле. Заманларын эркин этер ючюн, сабийни къолуна телефонну тутдуруп къоядыла. Алай  бла жилямагъан,   «тынч», «иги» сабий ёседи – кеси аллына, жукъ да излемей. Телефон аны юйретген, айнытхан этеди, деген оюм а эм уллу ётюрюкледен бириди.

Кёзле ауругъанны, санларын тутмагъаныны, нервалары къозгъалгъанларыны, тенглеринден айныуу бла артха къалгъаныны юслеринден айтыр кереклиси болмаз.