Ата журтха сюймекликни белгиси бла

Элбрус районда Къулийланы Къайсын атлы Маданият юйню аллындагъы майданда къырал байрамланы бек магъаналыларындан бирине – Россейни кюнюне – жоралап, уллу къууанч къуралгъанды. Ол кюн районну халкъын бла къонакъларын алгъышларгъа районну администрациясыны, къырал учрежденияларыны бла жамауат организацияларыны къуллукъчулары келгендиле.

Байрам, Россейни уллу байрагъын жайып, шахарны ара орамында жюрюу бла башланнганды. Жыйылгъанлагъа алгъышлау сёзюн районну администрациясыны башчысыны биринчи орунбасары Толгъурланы Расул айтханды. Ол сёзюнде Ата журтха сюймекликни магъаналылыгъын энчи чертгенди.

Байрамны чеклеринде районну жетишимли коллективлерин бла ишчилерин да саугъалагъандыла. «Эльбрустуристни» таматасы Владимир Топалов районнга керекли заманда кёп кере болушлукъ бла тутхучлукъ этгени ючюн ыразылыкъ къагъыт бла белгиленнгенди. Элбрусну Къар юзюлюулеге къажау аскер отрядыны келечилери да ишлерине жууаплылыкълары ючюн саугъаланнгандыла. «Эльбрусские новости» район газетни редакциясы да районну жашауун тынгылы ачыкълагъаны ючюн 3-чю даражалы дипломгъа тийишли болгъанды. Бедикни бла 5-чи номерли гимназияны устазлары бла юнармиячылары «Зарница 2.0.» оюнну регион урумунда жетишимлери ючюн саугъаланнгандыла. Отарланы Керим атлы 1-чи лицейни «Жомакъ» сабий садын «Жылны сабий сады» деген Битеуроссей эришиуде хорлагъанлары бла алгъышлап саугъалагъандыла.

Район башчыны орунбасарлары Согаланы Магомет бла Анзор Кармов районну жаш адамларына аланы Россей Федерацияны инсанлары болгъанларына шагъатлыкъ этген биринчи къагъытларын, паспортларын къууанчлы халда тутдургъандыла.

 Хар замандача, уллу концерт программа жыйылгъанланы къууандыргъанды. «Салам», «Арабеск» юлгюлю тепсеу къауумла бла «Феникс» атлы бусагъатдагъы тепсеулени студиясы байрамгъа къууат бергендиле. Атмырзаланы Жаннаны, Ёзденланы Танзиляны, Тебердиланы Зухураны, Джаппуланы Фатиманы бла Рустам Шаушевни Ата журтубузгъа сюймекликден толгъан жырлары майданнга келгенлени жюреклерине жетгендиле. 
 Байрамны Элбрус районну Маданият управлениясы къурагъанды.