Ырхыладан къорууланыуну амалларын сюзгендиле

РФ-ни МЧС-ини КъМР-де Баш управлениясында ырхыладан къорууланыугъа жораланнган ведомствола аралы кенгеш ётгенди. Анга  ведомствону таматасыны къуллугъун толтургъан Эльдар Хашхожев башчылыкъ этгенди. 

Тюбешиуге КъМР-ни Къурулуш, жашау журт эм коммунал мюлк министерствосуну, Элбрус районну администрациясыны келечилери, «Антиград» илму-производстволу араны эм Бийик - тау геофизика институтну специалистлери къатышхандыла.  

Жыйылыуда билдириу бла  профессор Абшаланы Магомет сёлешгенди.  Тырныауузну  табийгъат къыйынлыкъдан сакълауну амалларыны юслеринден айта, ол Гирхожан суу бла байламлы бютюн къыйматлы мадарла этерге кереклисин энтта бир кере эсгертгенди. Ол тийреде ырхыланы халларыны эмда аладан не къадар аз хата жетерча этиуню юслеринден илму шартла келтирип билдиргенди. Ырхы ызланы къалай бла кючлерге боллугъун ачыкълай,  тыш къыралланы сынамларын да юлгюге келтиргенди. 

- Бюгюнден башлап къайгъысын кёрмесек, чыранла эрип, череклеге къошула башласала, ары дери уа ай чакълы заман къалгъанды да, кеч болургъа къоркъуу сакъланады, - деп чертгенди Абша улу.

РФ-ни МЧС-ини КъМР-де Баш управлениясыны пресс-службасыны таматасы Кантемир Беров билдиргеннге кёре, кенгешде  туура этилген шартланы эсге ала, вертолёт бла тинтиуле бардырыллыкъдыла. Къая-Артыны тийресинде эки веб-камера  орнатыллыкъды. Дагъыда хауа болумланы эсеплеген къауум да ишлерикди.