Уруннган инсаннга къайгъыра

Урунуу эркинликлени сакълауну XI битеуроссей ыйыгъы (ВНОТ-2026) быйыл 7-10  октябрьге дери Сочиде «Сириус» университетде бардырыллыкъды. Аллай оноу бу ишге хазырланыу эмда аны бардырыу жаны бла къурау комитетини РФ-ни Правительствосуну Председателини орунбасары Татьяна Голикова бардыргъан жыйылыуунда этилгенди, деп билдиргендиле Россейни Урунуу эмда социал къоруулау министерствосуну пресс-службасында.

Къурау комитетни ишине РФ-ни урунуу эмда социал къоруулау  министри Антон Котяков, Россейни Президентини кенгешчиси Антон Кобяков,  Россейни промышленниклерини бла предпринимательлерини союзуну президенти Александр Шохин, Россейни Медицина-биология жаны бла федерал агентствосуну башчысыны биринчи орунбасары Татьяна Яковлева, дагъыда Россейни Президентини Администрациясыны, Россейни Правительствосуну, федерал эм регион министерстволаны бла ведомстволаны, «Росконгресс» фондну, Ростехни, Росатомну, Газпромну, Жалынчакъсыз профсоюзланы федерациясыны,   Россейни промышленниклерини бла предпринимательлерини союзуну да келечилери къатышхандыла.

«Урунуу эркинликлени сакълауну битеуроссей ыйыгъы он жылны ичинде уллу жолну ётгенди: ишин, тинтиулерин да кенгертгенди. Ишчи жерле азлыкъ этген кезиуде биз урунуу болумланы бла онгланы игилендириуге, ишлегенлени жашауларын бла саулукъларын сакълаугъа бютюн жууаплы кёзден къараргъа борчлубуз.  ВНОТ-ну жыл сайын бардыргъан мадарлары социал-урунуу жаны бла кемчиликлени кетериуню къыйматлы амалларын табаргъа болушадыла», - дегенди къурау комитетни таматасы Татьяна Голикова.

Ол арт 10 жылны ичинде иш юсюнде ачыгъанланы санын азайта барыргъа къолдан келгенин, аллай жарсыуланы болдурмаз мурат бла этилген мадарлагъа бёлюннген ахчагъа да къошула баргъанын эсгертгенди.

2026 жылда ВНОТ-ну майданларында бёлюмню кёрмючюн къурау бла бирге, промышленность робототехника жаны бла энчи кластер къураргъа белгиленеди. Россейни Медицина-биология жаны бла федерал агентствосуну себеплиги бла кёрмючде промышленность медицинагъа, уруннганланы реабилитациялаугъа эмда саулукъларын къайтарыугъа энчи эс бёлюнюрюкдю.

«ВНОТ-ну баш темасы - «Социал магъаналы технологияла - миллет муратлагъа жетиуню амаллары». Форумда биз бусагъатдагъы оноуланы социал жанына бурууну программасын сюзерге керекбиз. Анда уруннган адамны саулугъу бек уллу хазна болгъаны эмда жангы, бютюн къыйматлы амалла излерге кёллендиргени шарт тохташдырылады. Программагъа кёп тюрлю соруула кирликдиле: ишде ачыгъанланы тинтип эмда билип тургъан цифралы амалланы сингдириуден башлап, производствода ишлегенлеге къайгъырыуну жангы тёрелерин къураугъа дери», – деп чертгенди Россейни урунуу эмда социал къоруулау министри Антон Котяков.

Россейни Президентини кенгешчиси Антон Кобяков форумда сюзюлген соруу производствода урунууну къоркъуусузлугъу бла чекленип къалмагъанын, энди ол къыралгъа бла хар инсаннга стратегия магъананы тутхан сорууланы бирикдиргенин чертгенди.

«Бюгюнлюкде къыралны баш социал форумуну борчу - къыралда адам байлыгъына эмда социал ырахатлыкъгъа къошула барырча этиудю. Бюгюннгю жыйылыуда кёп тюрлю соруулагъа жууапла изленедиле. Ала халкъны жашауун игилендириуню амалларын жарашдырыу, урунуу эмда иш бла жалчытыу рынокну къыйматын кётюрюу, социал страхованияны тап халгъа келтириу, саулукъ сакълауну алчы амаллары, дагъыда социал болушлукъну тынчлыкълы амалларын табыу дегенча сорууладыла. 2026 жыл Россейни халкъларыны бирлигини жылы болгъаны бла байламлы, ВНОТ-ну Россейни халкъларыны бир ниетлиликлерин кёргюзтюр ючюн хайырланыргъа боллукъду. Нек дегенде ол бирлик инсанларыбызгъа, ала къайсы регионда жашагъанларына да къарамай, урунууну тенг да, къоркъуусуз да болумларын къурау бла байламлыды», - деп чертгенди Антон Кобяков.

Урунуу эркинликлени сакълауну XI битеуроссей ыйыгъыны чеклеринде предприятияла эм иги сынауларын бла инвестициялы онгларын кёргюзтюрге онг табарыкъдыла. Андан сора да, ВНОТ-2026 кёрмючде жангычылыкъланы, къоруулау кереклени, инновация жумушланы кёргюзтюрге энчи жерле бёлюнюрюкдюле. Дагъыда, тёреде бола келгенича, эм уллу предприятияланы келечилени къатышыулары бла Жаш тёлюню кюню ётдюрюллюкдю, социал жумушланы жалчытыуда профессионал усталыкъны, урунууну къоруулау жаны бла да конкурсланы эсеплери чыгъарыллыкъдыла.