Энди Европаны биринчилигине къатышырыкъдыла

Бу кюнледе Ноябрьск шахарда ауур атлетикадан Россейни биринчилиги ётгенди. Ол 15-23 жыллары толгъан спортчу жашланы бла къызланы араларында бардырылгъанды. Ары Россейни 41 субъектинден 200 гёжеф къатышханды, деп билдиредиле КъМР-ни Спорт министерствосундан. 

Бу эришиуледе Къабарты Малкъарны спортчулары юч майдалгъа тийишли болгъандыла. 

Алай бла 81 килограмм ауурлугъу бла Гюлюйланы Тамерлан алтын майдал алгъанды. Двоеборьеде ол 314 килограммны кётюргенди. 219 килограммны кётюрген Алана Скрипко (81 кг.) «кюмюшге»,  340 килограммны кётюрген  Ислам Шердиев (109 кг.) «доммакъгъа» тийишли болгъандыла.

Бу турнирни эсеплерине кёре, Гюлюйланы Тамерлан бла Алана Скрипко Россейни жыйымдыкъ командасына киргендиле. Ала 23 жыллары толмагъан спортчу жашланы бла къызланы араларында бырдырыллыкъ Европалы биринчиликге къатышырыкъдыла. Ол сентябрьде Албанияда ётерикди.

Спортчула Жаппуланы Магомет бла Михаил Шекемовда жарау этедиле.