Уста кетсе да, иши сакъланыр

Болгъандыла тау элледе устала: жырчыла, назмучула, таурухчула, хуначыла, агъач устала, кюмюшчюле, темирчиле эм башхала. Ала этген ишлери бла махтау алгъандыла. Сёз усталаны айтханлары, жырлары бюгюн да айтыладыла, эски хунала да сюеледиле. Кюмюш накъышланы сакъланнганлары да бардыла.

Аты бюгюнлюкде да унутулмагъан, этген ишлеринден бир къаууму сакъланнган усталадан бири кюмюшчю Башийланы Алий-Хажи болгъанды. Туудукълары билдиргеннге кёре, ол онсегизинчи ёмюрню аягъында Огъары Малкъарда туугъанды. Багъалы темирден ат керекле, къамала, тиширыулагъа сыргъала, жюзюкле ишлегенди. Устаны аты сау миллетде айтыла эди.

Юйдегили болгъандан сора, анга беш къыз туугъанды, уланы болмагъанды. Сора кюнлени биринде ол Меккагъа тебирейди. Хаж къылыргъа баргъанлагъа къошулуп, жолгъа чыгъады. Азмы, кёпмю барды, къыйналдымы-къалдымы, алайсыз да болгъан болмаз, ахырында муслийманланы эм сыйлы жерлерине жетеди. Анда жумушларын тындырып, нёгерлери ызларына къайтханда, Баший улу къалады.

Къуран окъургъа да юйренеди, Аллахдан кесине улан тилеп турады. Юйюне эки жылдан къайтхан эди. Сыйлы жерде этген тилеклери да толуп, анга беш жаш туугъанды.

Алай бла Алий-Хажи он сабийни атасы болгъанды. Кюмюш ишин къоймай бардырып, жашларына бирер кюмюш ат керек  да хазырлагъан эди ол. Аланы хапарлары битеу Беш тау элге да жайылгъанды. Неда этип, алагъа ие болургъа сюйгенле уа  кёп эдиле.

Бир жол Алий-Хажини жашы Бекмырза аты бла къошха келгенди. Андагъыла анга жарыкъ тюбеп, атын къош аллында тагъып, иерин тешгендиле. Бекмырзаны уа къош ичинде олтуртуп, сыйлагъандыла. Жаш жолгъа тебирегенде уа, излейдиле да, иерин тапмайдыла. Алайда кёп адам да жокъ эди, барысы да таныгъанлары. Къалай-алай болса да, иерин тас этгендиле.

Арада жюрек къыйын  болгъан эди ол иш. Алай уручуну къолундан тутмасанг, къайдан билликсе ким болгъанын. Жюгенни уа Бекмырза сакълагъанлай турду. Халкъны Азиягъа кёчюрген кюнню аллында аскерчиле элге нек келгенлерин билип, жюгенни бир тешикге сугъуп, букъдуруп къойгъанды. Андан къайтхандан сора табып алгъанды.

Бекмырза 1967 жылда жюз жылдан атлап ауушханды. Туудукълары айтадыла ол Ленинден аз алгъаракъ туугъан эди деп.

Кюмюшчюден дагъыда бу жюрек сурат къалгъанды. Ол а Башийланы тукъум тамгъаларыды.

Уста киши дуниядан эртте кетген эсе да, иши туудукъларында сакъланнганды. Ала аны бла ёхтемлене жашайдыла.