«Кюмюш» бла къайтхандыла

Аманлыкъчыланы терсликлерине жолукъдуруу жаны бла федерал службаны КъМР-де Управлениясыны 1-чи номерли колониясыны къаууму кинологланы араларында битеуроссей  чемпионатда алчы болгъанды.
 Ведомстволу эришиулеге Россейни 51 регионундан 150 адам къатышханды. Кинологла итлери бла наркотиклени, чачдырыучу затланы излеп эришгендиле, сынамларын, билимлерин кёргюзтгендиле. Итле ууну, сауутланы  мекямны ичинде, ачыкъ жерледе, транспортда, адамланы кийимлеринде излегендиле, дагъыда аманлыкъ этген (жалгъан) адамны сакълауда, аланы тутулгъан жерге ашырыуда билимлерин кёргюзтгендиле. 
Инструктор-кинолог Артур Сасиков ити  Дези бла  машинада эмда  гитче затчыкъланы ичинде букъдургъан чачдырыучу затланы башхаладан терк табып, эришиуледе экинчи жерге чыкъгъандыла. 
Аланы бу жетишим бла Управленияны башчысы Александр Демидов алгъышлагъанды. Ол Артурну сынамын белгилеп, аны жетишими ючюн ич службаны тамата прапорщиги чын бла саугъалагъанды. 
Артурну бла Дезини ол жангыз хорламлары тюйюлдю. Былтыр бу эришиуледе ала чачдырыучу затланы излеуде ючюнчю жерге чыкъгъан эдиле.