Кёлледе жууунуу – хатасыз

Июньда республикада жайда жууунуу кезиу башланады, аны бла байламлы МЧС-ни регионда адамланы суулада къоркъуусузлукъларын жалчытыу жаны бла бёлюмюню инспекторлары суу жагъалада солууну къурау не халда болгъанын тинтедиле.
 Бу жол ала Нальчикде экинчи кёлде болгъандыла. Анда къутхарыу кереклеге, къайыкълагъа, суулада батханлагъа бла ачыгъанлагъа болушлукъ этерча юйрениуледен къутхарыучуланы ётгенлерине бла къалгъанларына, биринчи медицина болушлукъ этиу пунктха, сууда батмаз ючюн кийилген огъары жанла жетишириклерине, жууунургъа жараулу эм жарамагъан жерлени кёргюзтген белгиле орнатылгъанларына къарагъандыла. 
Бёлюмню башчысы Амирби Бжахоков чертгеннге кёре, быллай тинтиулени магъанасы уллуду, аланы кезиулеринде битеу кемчиликле алгъадан ачыкъланып, тюзетирча мадарла этиледиле. 
Ведомство республикабызда суулада солуу жерлени тизмесин да бергенди. Ала быладыла: Нальчикде «Курортное» кёл бла экинчи кёл, Аушигерде жылы сууланы «Каншао» жалгъан кёл, «Мая» жалгъан кёл, Черек районда Огъары Чирик кёл, Терек шахарда кёл, Прохладный шахарда «Оазис» бла «Авангард» солуу арала,  «Гедуко» ара.
Гитче къайыкъланы хаух алыргъа тёрт жерде боллукъду: Нальчикде «Трек» кёлде, «Курортное» эм экинчи кёлледе, Черек районда Огъары Чирик кёлде. 
 Терк эмда къутуруп келген суулада жууунургъа, къайыкълада жюзерге арталлыда жарамайды. Кёлледе бла черекледе къоркъуусузлукъну жорукъларын унутмагъыз, суу сансызлыкъны сюймейди, марданы билмеген, уллу кёллюлюк этген аны ючюн уллу багъаны тёлерге боллукъду, деп эсгертедиле МЧС-ни регионда Баш управлениясындан.