Усталыкъ алыргъа излегенлеге себеплик уллуду

Къабарты-Малкъарны Урунуу эм социал къоруулау министерствосунда Жамауат совет жыйылыуунда регионну социал жаны бла айныууну амаллары сюзюлгендиле, деп билдириледи Жамауат палатаны сайтында.

Энчи эс инсанлагъа жангы усталыкъ билим бериуге, монополиягъа къажау мадарла табыугъа, «Урунууну ветераны» деген атны алыуну жорукъларын ангылатыугъа бёлюннгенди. Алай бла «Кадры» миллет проектни хайыры бла иш излегенле 213 жангы усталыкъгъа юйренирге боллукъдула, ол санда нейросетьле, жалгъан интеллект бла ишлеуге, мекямланы шёндюгюлю излемлеге кёре хайырланыугъа, бухгалтериягъа, социо-маданият борчланы тамамлаугъа, цифра амалланы кийириуге, администраторгъа эм башхалагъа. Пенсия жыл саннга жете тургъанлагъа, энчи аскер операциягъа къатышханлагъа, гитче сабийлери болгъан тиширыулагъа, сакъатлагъа бла жаш адамлагъа да къайгъырыу уллуду. Алагъа быллай билдириуле борчлу халда Урунуу, иш бла жалчытыу эмда жамауатны социал къоруулау арада бла аны бёлюмлеринде борчлу халда этилгенлей турадыла.

Монополия законодательствону толтурууну картасын тинте, жыйылгъанла министерство быллай къоркъуула чыгъаргъа боллукъ кезиулени эсепде тутханын эмда социал жаны бла этилген мадарла ачыкъ, хайырлы да болурларына къарагъанын айтхандыла.             

 Аскер къазауатлагъа къатышханлагъа болушууну, «Доступная среда» программаны толтурууну амаллары да сюзюлгендиле, ол санда реабилитация кереклени алыугъа бюджетден ахча бёлюу да. «Урунууну ветераны» деген сыйлы атны алыр ючюн а, билдирилгенича, узун стаждан сора да, инсан къаллай саугъалагъа, атлагъа, айырмалылыкъны ведомстволу белгилерине тийишли болгъаны да эсге алынады.

Совет ишин жылны ичинде бардырлыкъды.