Ичгичини сабийи бу осал къылыкъгъа башхаладан терк юйренеди

РФ-ни Саулукъсакълау министерствосу быйыл 1-7 июньда  сабийни саулугъун сакълауну ыйыгъын бардырады. Аны чеклеринде КъМР-ни Психиатрияны бла наркологияны клиника арасы  аракъы, наркотикле сабийни саулугъуна къаллай хата келтиргенин эсгертедиле.

- «Ол баласыны къатында ичмейди», «Ол бек иги анады, хау, бирде уртлайды, алай сабийле аны сезмейдиле»… Быллай сёзлени, жарсыугъа, саусузларыбызны арасында терк-терк эшитирге тюшеди. Алай кеслерине сылтаула излегенлени, аракъы ичерге ёч болгъанларын букъдурургъа кюрешгенлени умутларын юзерге сюебиз: сабий тамата этгенни къайтарады. Тарихлеге кёре уа, ичгичилени юйюрлеринде ёсгенле тамата заманда аракъыны, наркотиклени башхаладан эсе тёрт кереге аслам хайырланадыла, - дегендиле бизге клиниканы пресс-службасындан. 

Ата, неда ана байрам кюн, арыгъанын кетерир, кёлюн кётюрюр  неда алача башха  ётюрюк сылтаула излеп иче эсе, сабий аны этгенин тюзге санап, юйренчек болады. Кеси да сынаулагъа тюбесе аладан аракъыны болушлугъу бла къутулургъа излерикди.

- Ичгичилени юйюрлеринде болум сабийни саулугъун бузгъаны бла бирге психикасын да осалгъа бурады. Артда ол да «ырахматлыкъны» аракъыда, наркотикледе излерикди. Алай саулукъну сакълар онг  барды – заманында кесинге бакъдырыргъа.  Бизни клиниканы психологлары быллай болумлада ёсгенлени сабий жараларын сау этерге болушадыла, - дегендиле бизге клиникадан.