Хунерликлерин, гиртчиликлерин да кёргюзтгендиле

РусГидро компанияны къыралны къыбыла регионларында бёлюмлерини арасында бардырылгъан сегизинчи Спартакиаданы эсеплерине кёре, Къабарты-Малкъарны гидроэнергетиклерини къаууму кубок къоллу болгъанды, деп билдиргендиле бёлюмню пресс-службасындан.

Эришиуле эки кюнню ичинде бардырылгъандыла. Энергетик спортчула, ол санда къуру эр кишиле угъай, тиширыула да, кеслерини къарыуларын бир ненча жаны бла кёргюзтгендиле: многоборье, чабыу, футбол ойнау эм башхаларында.
Многоборье деген тюрлюсюнде бирсилени арасында эм кёп балл алып, тиширыулада – Шимал Осетияны, эр кишиледе уа бизни республиканы къауумлары ал жерлеге чыкъгъандыла.

Футболда уа эришиу къайда къызыу болгъанды. Биринчиден, Инфраструктура проектле деген къауумну 1:0 эсеп бла Къабарты-Малкъарны келечилери хорлагъандыла. Дагъыстанлыла уа Шимал-Осетиядан келгенледен эсе (3:0 эсеп) кючлю болгъандыла.

Финалгъа чыкъгъанла бир бирлерине хорлатмазгъа кюрешгенлери кёрюне эди. Болсада къазауат оюнну ахыры пенальти уруугъа жетип, аны эсеби уа КъМР-ден гидроэнергетиклени къауумун къууандырды.
Алайды да, битеу къауум зачётда «Къыбыла» бёлюмде биринчиле – бизникиле, экинчиле – осетинлиле, ючюнчюле уа инфраструктура проектле деген команда болгъандыла. Энди уа эришиулени кезиую «Ара» къауумгъа кёчгенди – ала бу кюнледе ойнарыкъдыла. Спартакиаданы финалы Москвада ётерикди.