Хунерлилеге – къарсла, саугъала да

Сабийлени къоруулауну халкъла аралы кюнюнде Яникой эм Каменка эллени маданият юйлерини ишчилери элли жашчыкълагъа бла къызчыкълагъа аламат байрам къурагъандыла. Бу жумушха КъМР-ни сыйлы артисткасы Теммоланы Фатима юйретген «Шаудан» тепсеу къауум, Музыка школну сохталары да сюйюп къатышхандыла. 

Маданият юйню арбазында ол кюн болмагъанча кёп сабий жыйылгъан эди. Художестволу башчы Чеченланы Абидат айтханнга кёре, Чегем районну маданият управлениясы алагъа саугъагъа аниматорланы жибергенди. 

– Сабийлеге кертиси бла да аламат байрам болгъанды. Саугъачыкъла да жарашдыргъан эдик. Предприниматель Гелястанланы Асият да къошумчулукъ этип, ол кюн сабийлени эслеринде къалырча этгенди. «Шауданда» тепсеген къызчыкъла юч номер кёргюзтгендиле. Музыка школгъа жюрюген элли жашчыкъла бла къызчыкъла да фахмуларын ачыкълагъандыла. 
Къууанч а тепсеуле, оюнла бла бошалгъанды. Алада къалгъан сабийлеге саугъала берилгендиле.