«Усталыгъымы атама къарап сайлагъанма»

Чаналаны Светлана сайлагъан усталыгъында отуз беш жылдан артыкъ заманны ишлейди. Ол Черек районну ара больницасында бек иги невролог врачха саналады. Аллай бир жылны ичинде  ишчи нёгерлерине, саусузлагъа да ариу тиллилиги, бийик усталыгъы бла да кесин сюйдюргенди. Анга «Къабарты-Малкъар Республиканы сыйлы врачы» деген ат аталгъаны да ишине кертичилей къалгъанына шагъатлыкъ этеди.

Светлана Огъары Малкъарда туугъанды. 1984 жылда КъМКъУ-ну медицина бёлюмюн бошагъанды. Нальчикде Республикалы клиника больницада неврология жаны бла интернатурадан да ётгенди. 1985 жылдан башлаб а Черек районну ара больницасында ишлеп келеди. 2019 жылда усталыкъны ёсдюрген курслада окъуп, психиатрия, ызы бла уа неврология  жаны бла да билим алгъанды. Кёп жылланы саулукъ сакълауда бет жарыкълы ишлегени ючюн РФ-ни Саулукъ сакълау министерствосуну сыйлы грамотасы бла саугъаланнганды, Къабарты-Малкъар Республиканы Саулукъ сакълау министерствосуну, районну администрациясыны, район больницаны да грамоталарына кёп кере тийишли болгъанды.

Ол уллу эмда шуёх юйюрде ёсгенди. Ала беш сабий болгъандыла. «Атабыз бла анабыз бизни ишден къоркъмазгъа юйретгендиле, билим алыугъа аслам эс бургъандыла. Жашауумда юлгю алыргъа, багъыу усталыкъны сайларгъа да адамым бар эди: атам Абдулла уста врач болгъанды. Кёп жылланы район больницада ишлегенди. Арт жыйырма жылны ичинде уа Огъары Малкъарда больницаны баш врачы болуп тургъанды. Ол саулукъ сакълауну отличниги, КъМР-ни сыйлы врачы эди. 

Анабыз Малика уа не заманда да от жагъаны жылыуун сакълагъанды. Аны терен акъыллылыгъы, жашау сынауу бизге, туугъанларына, туудукъларына да, кюн сайын болушадыла, тюз ыз бла барыргъа себеплик этедиле», - дейди Светлана.

Ушакъ эте келгенибизде, ол эсинде бютюн бек къалгъан кезиулени да эсгереди. Аладан бири медицина бёлюмге киргениди. «Ол жыл бизни юйюрге кёп ахшылыкъла бла бай жыл болгъанды: атама «Къабарты-Малкъар Республиканы сыйлы врачы» деген ат берилгенди. Ол саугъасын Валерий Коковну къолундан алгъан эди. Кимни эсинде бар эди, аллай атны жылла озгъандан сора мен аны жашы Казбек Валерьевични къолундан аллыгъым», - дейди ушакъ нёгерим.

Чаналаны юйюрлери республиканы Башчысы Казбек Коковдан «Врач усталыкъгъа кертичиликлери ючюн» деген бюсюреу къагъытха да тийишли болгъанды.

«Бу усталыкъны сайлагъаныма бир кере да сокъуранмагъанма. Ол угъай да, кесими башха ишде кёралмайма. Илму-техника айный баргъаны бла медицинаны онглары да ёсгенлери къууандырады. Аурууну тохташдырыу, багъыу амалла да игидене-иги бола барадыла, телемедицина айныйды. Алгъын биз хорлаялмагъан аурууланы иги кесеги артха кете барадыла.

Светлананы юйюр жаны бла да насыбы тутханды: баш иеси Анахаланы Альбий бла тёрт сабий ёсдюргендиле. Тамата къызлары Алима КъМКъУ-да  ингилиз тил жаны бла окъугъанды, билимин Американы Бирлешген Штатларында ёсдюргенди, андан сора окъууун Россейни Халкъланы шуёхлукълары университетинде бардыргъанды. Юриспруденция жаны бла экинчи бийик билим да алгъанды. Бусагъатда ол университетде преподаватель болуп ишлейди.

Ортанчы къызлары Марина, Ростовда медицина университетни «санитар врач» бёлюмюн бошап, Нальчикде санэпидемстанцияда ишлейди. Зухура КъМКъАУ-ну «кадастровое дело» бёлюмюн бошагъанды, Кадастр палатада ишлейди. Марина, Зухура да юйюрлери бла Къашхатауда жашайдыла.

Бек гитче жашлары Алий, школну бошагъандан сора, Сибирьни федерал университетини Саяно-Шушенскде институтуна кирип, «энергетик» усталыкъ алгъанды. «РусГидрода»  урунады, аспирантурада да окъуй турады.

«Ишден бош заманым болса, аны толусунлай юйюрюме, туудукъларыма жоралайма. Шуёхларым, жууукъларым бла терк-терк тюбеширге, китапла, медицина жаны бла статьяла окъургъа, билим жаны бла видеолагъа, онлайн курслада вебинарлагъа къараргъа да сюеме.

Байрамланы уа, бир онг табып, барыбыз да бирге ётдюрюрге кюрешебиз. Къызла бла миллет ашарыкъла хазырлайбыз. Туудукъларым а кими сурат ишлейди, кими башха зат бла къууандырыргъа кюрешеди. Кёлюбюзню жарыкъ этген, кётюрген да аладыла. Ма ол болур насып дегенинг», – дейди огъурлу ынна.