Сабийле школгъа хазырланырча

Кёп болмай КъМР-ни Жаш тёлюню ишлери жаны бла министерствосу   сабийлени къоруулауну халкъла аралы кюнюне атап «Сабийни школгъа хазырла» деген жандауурлукъ акцияны башлагъанды. Аны къууанч халда ачылыуу Нальчикде  Жаш тёлюню юйюнде ётгенди, деп билдириледи КъМР-ни Саулукъ сакълау министерствосуну пресс-службасындан.

Акция бла байламлы жайны узуну  волонтёрла  сабийге мектепде керек абериле - портфельден башлап юс кийимге дери мажарлыкъдыла эм ахча болушлукъ этилирча да болушурукъдула.

Быйыл бу огъурлу иш КъМР-ни Саулукъ сакълау, Урунуу эмда социал къоруулау, Жарыкъландырыу  эмда илму министерстволаны  билекликлери бла бардырылады.
 КъМР-ни Саулукъ сакълау министерствосу бир жолгъа  школчулагъа керек абериле алып,  ахча болушлукъ этип къоймай, волонтёрлары  жайны узуну бу жумуш бла кюреширча мадар этерикди.  Аны бла бирге хар бир медицина организацияда ахча жыйылырча орунла да салынырыкъдыла. 

Эсге  сала айтсакъ, больницаны, поликлиниканы,  амбулаторияны эм башха медицина араны ишчисини къошумчулугъу бла ведомство жыл сайын къолайсыз юйюрледен сабийле  жангы окъуу жылгъа хазырланыргъа болушады. Аны бла бирге жылдан-жылгъа жандауурлукъ акцияны магъанасы ёсе баргъаны да бютюн къууандырады.