«Сабийле бизни кеслерини сейир дунияларына иедиле, биз ол саугъа бла тийишлисича хайырланыргъа керекбиз»

Барды устазны аллай борчу – харкюнлюк ишин тамамлай, сабийлеге сейир затланы кёрюрге юйретирге, аланы чыгъармачылыкъгъа, билимге итиниулюклерин ёчюлтмезге. Кёнделенни Доттуланы Ахматны атын жюрютген 1-чи номерли орта мектебини устазы Будайланы Мадина ол жорукъну тюзлюгюне ишексизди.

- Устазны сыйлы борчу окъуучуну фахмусун эслерге эм аны айнытыргъа болушургъады, - дейди ол. – Хар бала неге тартыннганын, къайсы илмуланы билирге излегенин ачыкъларгъа тийишлиди. Сабий, мендеча, химик болсун деп айтмайма. Устаз балада хунерли къурулушчуну, шофёрну, артистни кёре билирге керекди. Ол а тынч тюйюлдю. Былайда профессионал билимден сора да, эрудиция, акъылманлыкъ эм кёп башха шартла керекдиле.

Мадина Борисова айтханыча, устазны ишин ол Тамайланы Хамит Таукановични – билимли химик, огъурлу адам - юлгюсюн кёре сайлагъанды. Бу предметге сюймекликни да анга Хамит Тауканович сингдиргенди, алай бла усталыкъ сайларгъа да болушханды. Тырныауузну 6-чы номерли школун тауусханлай, Мадина Х.М. Бербеков атлы Къабарты-Малкъар къырал университетге киргенди, сора Кёнделенни 1-чи номерли школунда ишлеп башлагъанды, урунуу стажы жети жылды.

 Мадина Борисовнаны усталыгъыны юсюнден мектепни башчылары былай айтадыла: «Дерслени бере, чыгъармачылыкъгъа, тириликге итиндирген халны къурай биледи. Гитчеле бла бир тил таба, окъутууну ахшы сезимле туудургъан жумушха айландырады, информация-коммуникация технологияланы, виртуал лаборатория ишле системаны, Интернет-ресурсланы хайырланады. Мадина Борисовна тогъузунчу класслагъа «Химия теорияда, задачалада, сынаулада», «Космос маршрутла», «Веществоланы тинтиуде химия амалла» дегенча программаланы жарашдыргъанды. Ол ишин тынгылы бардыргъанына уа окъуучуларыны бийик кёрюмдюлери шагъатлыкъ этедиле. Ол окъутхан жылланы ичинде беш сабий Битеуроссей олимпиаданы грамоталары бла саугъаланнгандыла».

 Къошакъ билим бериуню «Жаш химик» деген программасына кёре, устаз  окъуучуланы чыгъармачылыкъда хунерлерин айнытханындан тышында, экспериментге, илму-излем ишге сейирлерин да къозгъайды, алагъа усталыкъ сайлауда себеплик этеди. Сабийле дерследе алгъан билимлерин жашауда, турмушда да хайырланыргъа юйренедиле. Химияны окъуй, ала дуния, тёгерегибизде да хар не да ичинден къалай къуралгъанын кёредиле.

- Биз медный купоросдан кристалла ёсдюребиз, эфир жаула чыгъарабыз, алагъа ушаш башха сейир сынаула бардырабыз, - дейди устаз. – Алай бла,  хар окъуучум, жангы билим ала, жетишимли болады. Дерсде кёргенлери артдагъы жашауларында жарарыгъын ангылатама.  

Мадина Борисовна ишни атлауучла бла тенглешдиреди, сабийле бла ёргеден-ёрге кётюрюле баргъанларын, ол а окъуучуланы кючлерине ийнандыргъанын, бютюн уллу итиниулюк бергенин чертеди.

- Ол жол чыгъармачылыкъда сейир болумлагъа байды. Сабийле бизни кеслерини сейир дунияларына иедиле, биз а ол саугъа бла тийишлисича, артда: «Ол мени окъуучум эди», - деп, ёхтемленип айтырча хайырланыргъа керекбиз, деп белгилейди устаз.