«Спортну жери» фестиваль бардырылады

Республикабызны Спорт министерствосундан билдиргенлерине кёре, Россейни Эл мюлк министерствосу «Спортну жери» деген кезиулю фестивальны бардырады.

Ол «Эллени битеулю халда айнытыу» битеукъырал программаны чегинде элледе бла гитче шахарлада жашагъанланы спорт бла кюреширге, саулукълу жашау бардырыргъа, заманларын хайырлы ётдюрюрге кёллендирир муратда толтурулады. Фестиваль 3 кесекден къуралады: муниципал, регион эм битеуроссей финал. Ол битеу да юч кере бардырылгъанды, биринчи кере анга 39 регион къатышханды, экинчи кере – 57, былтыр – 65. Быйыл а, аны географиясы кенгертилип, регионла барысы да къошулурукъдула, алай бла кеслерин анда башха-башха жыл санда 20 мингден аслам адам сынарыкъдыла. 

Фестивальны муниципал кесеги апрельде башланнганды, анга тюрлю-тюрлю спорт башламчылыкъла, командалы зарядкала, ГТО-ну мардаларын бериу, кюч-къарыу сынау, юйюр эришиуле, сабийлени араларында чабыула, айтхылыкъ спортчуладан юйретиуле, волейболдан бла гитче, футболдан оюнла киргендиле.

Эришиулени барыуларын земля-спорта.рф официал сайтда кёрюрге боллукъду, жангылыкъла дагъыда «Вконтакте», Телеграм эм MAХ ресурслада басмаланадыла.