Къышда чач тюклени тамырларын юйютмегиз, жазда уа чачыгъызгъа кюн тийдирмегиз»

Стресследен толу дунияда адамны чачы тюшюп кетерге болады. Бу жарсыуну юсюнден косметолог Этчеланы Анжела бла ушакъ этгенбиз.

-Чачны тюшюуюне къажау кюрешде хайырланылгъан дарманла бармыдыла?

- Бек кёп, бусагъатда аланы саны  мингле бла саналыады.  Алай, жарсыугъа, ала алай кёп адамгъа болушмайдыла, нек дегенде чыгыр болууну сылтауу асламысында (95 процентде) андропед алопецияды. Ол а  эр кишилик  гормонну артыкълыгъыны  хатасындан болады. Алай бла уа чачны молекулалары бузуладыла. Былайда бир тюрлю дарман, шампунь да болушмайды аны кетип барыууна.

Адамны чачыны халы жашауу бла бек байламлыды. Къыйынлыкъладан сора тюшюп къалыргъа болады. Неда ач – жаланнгач болгъанланы да чачлары отча жылтырамайды. Чачны халы саулукъну шартларындан бириди. Онкология аурууладан къыйналгъанла химия этгенде чачлары нек тюшеди? Бу соруугъа жууап: чач  адамны санында – чархында болгъан затлагъа кёре ёседи. Къагъанакъ кюч ала барса, чачы да къалын бола барады. Ол аны кюч алгъанын кёргюзтеди. Къартланы бир къаууму чыгырла болгъаны уа къарыулары кетгенине шагъатлыкъ этеди.

- Алопециягъа къажау кюрешде къыйматлы не амал барды?

- Бек баш амал   тюкчюклени бир жерден башхасына кёчюрюп орнатыуду. Чачны бу тюрлю проблемасындан къутулур ючюн, чыгыр бола башлагъан адамны чархыны тюрлю-тюрлю жерлеринде ёсген тюклени хайырланадыла. Аланы адамны башыны эки жанындан, желкесинден  (ала бек ахырында кетедиле башдан), алып кёчюредиле керек жерлеге. Бюгюнлюкде чачны кёчюрюуню эки амалы хайырланылады – журун  амал  эм тюклени тикмей орнатыу амал.

Врачла-трихологла кеслери айтханларыча, операцияны къыйматы специалистни усталыгъы бла къаты  байламлыды. Ол себепден а клиниканы да бек сакъ сайларгъа  керекди. Тийишлисича оборудованиялары эм сынамлары болгъан багъыу арала алай кёп тюйюлдюле. Быллай операцияла косметология кабинетледе этилмейдиле. Бизде чач тамыр болгъанча кёрюнюрча точкала салынадыла, аланы саулукъгъа бир заранлары жокъду, эки жылдан бу бояу кеси аллына кетип къалады.

-Адамны башында орта эсепден къаллай бир тюк ёседи?

-Орта эсепден - жюз минг тюк ёседи. Ол себепден а андан бир  кесеги къорагъаны ючюн  адам уллу жарсыргъа керек тюйюлдю. Кюн сайын жюз  тюк тюше  эсе башдан, кюз артында уа андан окъуна кёбюрек, медикле айтханнга кёре, жарсыргъа кереги жокъду. Башда айтылгъандан кёп тюше эсе уа, къорууланыуну мадарларын хайырланыргъа керекди.

- Не мадарладыла ала?

-  Чачыгъызны, фолликулалагъа хата жетдирмей тап, акъырын тарагъыз.Сора чачны тюшмей сакъланыуларына кератин себеплик этеди, ол себепден а эрттен азыкъда чабакъ, жумуртха, тауукъ эт ашай турургъа керекди.

 Чачлары тюшген адамла семиз этден жарашдырылгъан ашарыкъны, кофеинни, аракъыны, бал тузну ашамасала игиди – бу продуктла чачны тюшюрген гормонланы кёбейтедиле.

Къышда баш кийимсиз айланмагъыз, башыгъызны сууукъ этмегиз, чач тюклени тамырларын юшютмегиз. Жайда уа чачыгъызгъа кюнню тийдирмегиз.

Чачыгъыз къаллай болса да, аны аяп жууугъуз – асыры исси сууну хайырланмагъыз. Жуугъандан сора уа, чачыгъызны сууукъ суу бла чайкъагъыз – ол къанны айланыуун игилендиреди, чачны жылтыратады, тюклени бегитеди.

- Адамны чач тюклери бла байламлы статистика да болур?

- Хау, барды. Башында айтханымча, хар инсанны башында жюз минг тюк болады. Ала бютюнда кёп сары шинли тиширыулада боладыла – жюз бла элли  минг.

Ала орта эсеп бла адамны башында бир кюннге  тёрт миллиметрге, жылгъа онеки сантимертге, битеу жашауунда уа жети метрге  ёседиле.

Адам бир кюнде  жюз тюгюн тас этгенликге, чыгыр болмай жашарыкъды. Андан кёп чач тюк тюше эсе уа, адам чыгыр болмауну къайгъысын эте башларгъа керекди.

Тиширыуланы чачларыны тамырлары эр кишиленикиледен эсе  эки миллиметр теренирекде орналадыла.

Къарыулукъларына  кёре чач тюклени акъкъалай (алюминий) бла тенглешдирирге боллукъду – ала 100-ден 200 граммгъа  дери ауурлукъну кётюредиле.

Эр кишилени тюклерини жашаулары орта эсеп бла эки жылды, тиширыуланыкъыланы уа тёрт - беш жылды.

Чачны жууаргъа керекли сууну бек тап жылылыгъы 35-45 градусду.

Тюклени хар тамырындан адамны битеу жашауунда бир- бири ызындан  жыйырмагъа жууукъ чач тюк ёсерге боллукъду.