Кесинги, жууукъларынгы да ууландыраса

26-31 майда Россейни Саулукъ сакълау министерствосу тютюннге къажаулукъну ыйыгъын бардырады. Аны бла байламлы Психиатрияны бла наркологияны республикалы клиникасыны келечилери тютюн адамны саулугъуна салгъан хатаны юсюндн эсгертедиле.

-Тютюнню уууну ийиси эриши болгъаны бла бирге анда 7000 химиялы затла бардыла. Аладан 69-су канцерогенледиле. Тютюн адамны  ёпкелери бла бирге жюрекни ишин бузады, инфаркт урургъа къоркъуу уллуду. «Ол тютюн къан тамырланы иничгетртгени бла байламлыды. Дагъыда бу ууну тартхан сабийсиз къалыргъа боллукъду. Адамны психикасы да бузулады: жукълаялмайды, ол къайгъылы болады, жунчугъанлай турады»,-дегендиле бизге клиникадан.

Бирле тютюн иче эсем да, кесиме хата салама, деп сунадыла. Алай ала жангылгъан этедиле. Тютюн тартханны къатында тургъанланы саулукъларына заран салыргъа боллукъдула, ала бла бир отоуда тургъанланы ёпкелеринде  онкология башланырыгъына къоркъуу 30, инсульт урлугъуна уа 45 процентге       ёседи.

- Бютюнда сабийлени саулукъларына къайгъырыргъа керекди. Тютюнчюлени къатында астма башланыргъа боллукъду, ол угъай, бир тюрлю сылтау болмай, сунмай ауушуп къалгъан балала да быллай юйюрледе асламдыла. Алай бла тютюнню къабындыргъанда, адам тёгерегинде жууукъларын уу бла солутханларын билирге керекдиле,-деп къошхадыла клиниканы келечилери.

Аны бла бирге тёгерекдеги къудурет да ачыйды. Тютюнню фильтри къагъытдан этилмегенди, ол целлюлозаны ацетатыды. Ол а 10-15 жылны да къурумайды. Бу кезиуде уа  бир тютюн 1000 литр сууну ууландырады: свинец, мышьяк, никотин тюшеди. Орта эсеп бла уа дуния башында бир жылгъа 4,5 триллион тютюнню къабындырып, орамгъа атып къоядыла.

Чыпчыкъла, жаныуарла аланы ашасала уа, ичлери ууланып, къыйналып ёледиле. Экологла айтханларыча, тютюнню фильтри пластик артмакъдан да хаталыды.

- Тютюннге къажаулукъну ыйыгъы саулукъгъа биринчи атлам этерге тийишли кезиудю. Алай аны кеси аллына къойгъан къыйынды, аллай къарыуу тютюнчюлени 3-5 процентини барды, къалгъанлагъа уа врачны болушлугъу керекди. Бизни клиникада жарсыуугъузгъа болушургъа битеу онгларыбыз бардыла,-дегендиле бизге.