Къытлыкъ азая барады

Быйыл апрельде Къабарты-Малкъарда багъала аны аллында ай бла тенглешдиргенде,  0,3 процентге азайгъандыла. Баш сылтаула: бир-бир продуктланы чыгъарыу кёбейгенди, сомну сыйы да кётюрюлгенди, деп билдиргендиле РФ-ни Банкыны бизни республикада бёлюмюнден.

Азайгъан дегенде, тауукъ жумуртхала иги да учуз болгъандыла. Кюн жылына башлагъаны бла аланы чыгъарыу да кёбейгени себеплик этгенди. Сора бадыражанны, нашаны, татлы чибижини, бананланы эмда цитрус маталлы кёгетлени багъалары тюшгенди. Анга да хауа болумла себеплик этгендиле; сууукъла кетгенлери бла теплицалада жылытыугъа эмда жарытыугъа къоранчла азайгъандыла. Аны бла бирге уа сом кеси да кючлюрек болгъаны ючюн тыш къыралладан келтирилген кёгетле учузуракъ турадыла.

Аш-азыкъ рынокдан тышында болумгъа къарагъанда,  бегирекда связь средстволагъа, телерадиотоварлагъа, электроникагъа эмда турмуш техникагъа багъала тюшгендиле. Алай болуруна бир жанындан кредит бериу азайгъаны, башха жанындан а сомну сыйы кётюрюлгени себеплик этгенди.

Алай хар неда учуз болуп баргъанды деп айтырча тюйюлдю. Сёз ючюн, маршрут таксини багъасы кётюрюлгенди. Тийишли предприятияланы отлукъгъа, ремонт ишлеге эмда иш хакълагъа къоранчлары кёбюрек болгъаны ючюндю ол.

Тыш къыраллада солургъа сюйгенлеге уа болум иги жанына тюрленнгенди: сомну сыйы кётюрюлгени себепли ала таба жолну багъасы, бегирекда Къытайгъа эмда Къыбыла-Кюнчыгъыш Азия жанында талай къыралгъа учуз болгъанды. Къабарты-Малкъарда да санатор-саулукъландырыу жумушла ючюн азыракъ тёлерге боллукъду. Аны сылтауун Минги тауну этегинде къыш туризм кезиу бошалгъаны ючюн сурам азайгъанында кёрюрге тийишлиди.

Республикада жыллыкъ инфляция шошая барып, 4,7 процентде тохтагъанды. Къыралда орта кёрюмдюден ол энтта да азды. РФ-ни Банкы уа аны 4 процентге жетдирирге муратлыды.