Локияланы Жамболат – Россейни чемпиону

Россейни Жигити генерал-лейтенант Роман Кутузовну хурметине Суздальда грек-рим тутушуудан Россейни чемпионаты бардырылгъанды, анга  къыралыбызны  субъектлеринден эм къарыулу 250-ге жууукъ спортчу къатышхандыла.

Чемпионатда 63 килограммгъа дери ауурлукъ къауумда, битеу къаршчы гёжефледен кючлю болуп, алтын майдалны жерлешибиз Локияланы Жамболат алгъанды. Энди Жамболат къыралыбызны атындан дунияны чемпионатында тутушурукъду, ол а Къазахстанда боллукъду.

Алчы жерлеге республикабызны дагъыда талай келечиси чыкъгъандыла. Алай бла кеслерини ауурлукъ къауумларында «кюмюшлени»   Марат Кампаров, Ауэс Гонибов, доммакъ майдалланы уа Ахмед Кайцуков бла Улбашланы Адам алгъандыла. Аланы тренерле Олег Шокалов, Эдуард Белгароков, Тимур Умаров, Мурат Кишев, Мухамед Коготыжев бла Тахир Гоплачев хазырлагъандыла.

Гёжефлени бу жетишимлери бла республикабызны Башчысы Казбек Коков алгъышлагъанды эмда мындан арысында да, россейли спортха махтау келтире, хорламлы болурларын тежегенди.