Фахмулуланы ачыкълагъан байрам

Тырныауузну Къулийланы Къайсын атлы Маданият юйюнде Элбрус районну  маданият ишчилерини бла чыгъармачы коллективлени тёрели отчёт концертлери болгъанды. Ол регионубузда жашагъан миллетлени маданият байлыкъларын сакълагъан, байыкъдыргъан, фахмулуланы да ачыкълагъан байрам эди. 

Концертни Лашкутаны Маданият юйюню келечилери ачхандыла. Аны таматасы Акъ айланы Хыйса айтханнга кёре, алада юч кружок ишлейди: шахматлагъа, миллет тепсеулеге бла жырларгъа юйретген. Алагъа жюрюген сабийле концертде жырлап, тепсеп, кеслерини хунерликлерин кёргюзтгендиле.

Андан ары кезиу Тырныауузну Бауаланы Аминат таматалыкъ этген Маданият юйюне жетгенди. Мында да алты чыгъармачылыкъ кружок ишлейди. Аладан биринде миллет тепсеулени «Салам» деген юлгюлю ансамбль кюрешеди. Ол эмда «Тау суучукъла», «Театр къауум», «Сопрано плюс», «Элбрусну жулдузлары», «Феникс» той-оюн къауумла аламат концерт программаларын кёргюзтгендиле. Жарыкъ жырла эмда ариу тепсеуле къараучуланы къууандыргъандыла. Ахырында уа ансамбльлени таматалары, кеслери  тепсеп, къараучулагъа аламат саугъа этгендиле.

Кёнделен элни Гыттууланы Максим атлы Маданият юйю да тынгылы хазырланнганды бу байрамгъа. Анга таматалыкъ этген Батырбийланы Махти алада тёрт чыгъармачылыкъ биригиу ишлегенин билдиргенди. Ансамбльлеринден бирине – юлгюлю, башхасына уа халкъ деген даражалы атла берилгендиле. Жолабланы Муслим, Сарбашланы Магомет бла Аппайланы Амина ариу жырлагъандыла, «Сияние гор» деген къауум а эрттегили миллет тепсеуле бла къууандыргъанды. 

Быллымны Маданият юйюню жетишимлерини юслеринден окъуучуларыбызгъа билдире тургъанбыз. Ол кюн да аны келечилери хунерликлери бла къараучуланы къууандыргъандыла. Маданият юйню таматасы Байзуллаланы Джамиля билдиргеннге кёре, алада тёрт чыгъармачылыкъ биригиу ишлейди: миллет тепсеулени «Баллы» къаууму, сахна оюнланы «Теремок», шёндюгю тепсеулени  «Россейни жилтинчиклери», жырчыланы да «Инжичикле» деген биригиулери. Аланы программалары уллу да, сейирлик да болгъанды. 

Элбрус элни Маданият юйю да байрамгъа тири къатышханды. Аны таматасы Ирина Чумак алада алты биригиу ишлегенлерин айтханды. Аладан назму айтыргъа, къобуз, гитара согъаргъа, дауурбасда ойнаргъа, жырларгъа эм тепсерге юйретедиле. Ол кюн программаларында уа миллет тепсеуле бла бир жыр бар эдиле. 

Чыгъармачылыкъны байрамында районну ёсе келген тёлюсю не жаны бла да фахмулу болгъаны кёрюннгенди. Жыр айтхан къызчыкъла бла жашчыкъла ауазларын тюз ишлете билгенлери шарт эди. Аны ючюн аланы юйретген устазлагъа энчи ыспас этерчады. 

Тепсеулени юслеринден айтханда, ала сабийлени болгъанларындан да ариу кёргюзтедиле. Аланы хар къымылдаулары, атламлары да терен магъаналы болгъанын билип, сабийле тепсеуню тарыхын бла магъанасын ариу ачыкълаялгъандыла. Ол а, сёзсюз, фахмуну багъалы ышаныды. Эм гитчелени сахнада кесчиклерин  ариу жюрюте билгенлери къараучулагъа бек хычыуун кёрюннгенди. 

Районну маданият жашауун хар заманда да бийик даражада бардыргъан юйретиучюле бла устазла ол кюн ишлерин шарт эте, уллу махтаугъа тийишли болгъандыла. Сабийле бла ишлеген  тынч  тюйюлдю. Уллу тёзюм, ийнаныу эм кёллендире, кеси кючлерине ийнандыра билиу жетдиргендиле быллай жетишимлеге аланы сохталарын.  

Ахырында сёз Элбрус районну администрациясыны башчысыны биринчи орунбасары Толгъурланы Расулгъа берилгенди. Ол къуаннганын, ёхтемленнгенин да жашырмай эди. Быллай аламат ишни жетишимли бардырыр онгла къурагъаны ючюн районну Маданият управлениясыны таматасы Толгъурланы Жаннетге уллу ыспас этгенди. Жюрегин тутхан ишине саулай бере, маданият ишчилени барын да кёллендирип, бирикдирип ишлете билгени бюгюннгю байрамда шарт кёрюннгенин энчи белгилегенди.   

– Бу байрам бир ненча тёлюню араларында аламат кёпюр болгъанды. Жаланда быллай амалла бла къолубуздан келликди  маданият хазнабызны сакъларгъа, байыкъдырыргъа да, – дегенди Толгъурланы Расул. 
Ол байрамгъа «Фахмуланы симфониясы» деп атаргъа сюйгенин да ыразы болуп билдиргенди.  

Кезиу ингирни дагъыда бир аламат чагъына жетгенди – Элбрус районну маданиятын айнытыугъа уллу къыйын салгъан къауум адам администрацияны махтау къагъытлары эм ахча бла  саугъаланнгандыла. Ол сыйгъа  Быллымны Маданият юйюню таматасы Байзуллаланы Джамиля, «Инжичикле» деген къауумуну таматасы Хасан Шерхов, «Салам» юлгюлю ансамбльни таматасы Будайланы Руслан, Кёнделенни Маданият юйюню художестволу таматасы Тебердиланы Мухадин бла «Сияние гор» юлгюлю ансамбльни башчысы Байзуллаланы Элла эм башхала тийишли болгъандыла.