Билетлени – учуз багъа бла

Быйыл 30, 31 майда бла  1 июньда Элбрус тау-лыжа курортда Сабийлени къоруулауну халкъла аралы кюнюне атап уллу акция бардырыллыкъды. Ол санда гитчелеге  канаткагъа  билетни багъасы бир сом турлукъду. Биргелерине келген  абаданлагъа да   элли процентге аз тёлерге онг табыллыкъды.  

Акцияны къурагъанла айтханларыча, бир билет бла Азау таладан 3 847 метр бийикликге Гара-Башы станциягъа дери кётюрюлюрге жарарыкъды.  Мында Минги тауну этегинде табийгъатны энчи бети ачылады, аны себепли  суратха тюшерге  аламат жерди. Андан сора да, «Мир» станцияда Уллу Ата журт урушну кезиуюнде  Элбрусну немис фашистледен  къоруулагъан къызыл аскерчилеге жораланнган  музейде сейир экспонатла бла шагъырейленирге жарарыкъды.  

Ёмюрлени сакъланнган бугъоуланы деменгили сыфатлары уа кимни да эслерин бийлерчадыла.  Дагъыда мында Россейни эм бийикде орналгъан почта пунктундан открытка жиберирге онг барды.  

Байрамгъа аталгъан программаны иги кесеги Азау талада ярмарка майданында ётерикди. Аны кезиуюнде  сабийлеге тюрлю-тюрлю акцияла бардырыллыкъдыла, хакъсыз попкорн да юлешинирикди. Саулай алып айтханда, юч кюнню ичинде аниматорла  гитчеле эрикмезча булжутханлай  турлукъдула.