Къоркъуусузлукъну жалчыта

Борчлу халда сынауланы ётмеген экскурсоводла эм гидле-тилманчланы ачыкълар муратда жай туризмни кезиуюню аллында республиканы Курортла эм туризм министерствосу тинтиулени бардыргъанды.

Министерствону инспекторлары солугъанлагъа жолоучулукъла къурагъанла кимле болгъанларын тохташдырадыла, керек болса, бу ишге право низамны сакълаучу органланы келечилери да къошуладыла. Туризм жаны бла баш къырал инспектор Заур Гадзаев билдиргеннге кёре, бюгюнлюкде быллай ондан аслам тинтиу бардырылгъанды, аладан экисинде бузукълукъла этилгенлери тохташдырылгъанды. «Кемчиликле Черек районда къоншу регионладан къонакъланы жолоучулукълагъа чыгъаргъанда этилгендиле. Гидлени сынауладан ётгенлерини юсюнден шагъатлыкъ къагъытлары, бейджлери да жокъ эди. Аны бла байламлы административ бузукълукъланы юсюнден протокол жарашдырылгъанды», – дегенди ол. 

Биринчи бузукълукъ ючюн экскурсоводлагъа бла гидлеге эсгертиу этиледи, экинчи кере эсепге тюшгеннге уа 10 минг тазир тёлерге тюшерикди. Аны ючюн ведомствода адамланы жолоучулукълагъа аттестациясыз элтгенле жууапха тартыллыкъларын чертедиле. Бусагъатда Экскурсоводланы бир къырал тизмесинде аттестацияны ётген республикабызда бу жаны бла ишлерге эркинликлери болгъан юч жюзден аслам инсан бардыла, аладан сегизи тыш къыраллы тиллени да биледиле.