Ата-аналагъа себепликге

Сакъат сабийле  ёсдюрген ата-аналагъа неда осуйлукъ этген инсанлагъа айны ичинде къошакъ халда эки солуу кюн алыргъа эркин этиледи, ала ючюн хакъ да тёленеди. Алай бла быйыл бу халда берилген 1 198 солуу кюн ючюн Социал фондну регионда  бёлюмю 4 287 300 сом тёлегенди.  

Бу амал бла ата неда ана, неда экиси да, солуу кюнлени юлешип, хайырланаллыкъдыла. Сёз ючюн, эки кюнню – ана, къалгъанын а ата алыргъа боллукъдула, аны юйюр кеси сайларгъа эркинди. Андан тышында, къошакъ солуу кюнлени жыйып, 24-кюнлюк отпускга чыгъаргъа жарайды. Аны ючюн инсан ишлеген жеринде кадрла бёлюмге заявление жазаргъа, сабий туугъаныны эмда ол сакъат болгъаныны юсюнден шагъатлыкъ къагъытланы, юйдегиси ол кезиуде къошакъ солуу кюнлени алмагъаныны юсюнден  справканы къошаргъа керекди. 

Унутмагъыз: бир жылгъа берилген, алай хайырланылмай къалгъан солуу кюнле экинчи жылгъа кёчюрюлмейдиле. Экинчиден, ала урунуу эм декрет отпускланы кезиулеринде берилмейдиле. Аны бла бирге, ана декрет отпускда эсе, къошакъ солуу кюнлени ата алыргъа боллукъду.