Минги тауну этеклеринде жараула этерча онгла къураллыкъдыла

«Эльбрус» курортда олимпиада эм паралимпиада спортну тюрлюлерине кирген ол санда тау лыжаладан, сноуборддан, фристайлдан, ски-альпинизмден россейли спортчулагъа жараула этерча шёндюгюлю онгла къуралгъандыла. Ол бек магъаналыды эм керекли жумушду Къабарты-Малкъаргъа, нек дегенде бийик тау жерледе дайым къыралыбызны алчы спорт командаларыны тюрлю-тюрлю дисциплиналада жараулары бардырылып турадыла, деп билдиргенди КъМР-ни Башчысы Казбек Коков MAX-да каналында.

Ол жумушла бла байламлы РФ-ни Правительствосуну Председатели Михаил Мишустин 30 апрельде Правительстволу комиссияны келечилери бла бардырылгъан жыйылыуда буюруу бергенди. Анга кёре РФ-ни Спорт Министерствосу, РФ-ни Экономика айнытыу министерствосу эм Кавказ.РФ биригиу бла бирге 1 сентябрьге оюмла хазырларгъа керекдиле.

Эсигизге салайым, жыйылыу Минеральные Воды шахарда Кавказ инвестиция форумну чеклеринде бардырылгъан эди.  

РФ-ни Правительствосуну оноучусу берген буюруулагъа бизни республикагъа магъанасы уллу болгъан регионла аралы турист маршрут жолну кезиу-кезиу тапландырыу бла байламлы «Кавказны миллет жолу» деген проект киргенди. Ол жол Дагъыстанны, Чеченни, Ингушетияны, Шимал Осетия-Аланияны, Къабарты-Малкъарны, Къарачай-Черкесни эм Краснодар крайны ичи бла ётеди. Башланнган а Дербентде этеди, бошалгъаны уа – Сочи шахарда.

Белгиленнгеннге кёре, проект 5 августха хазыр болургъа керекди. Аны РФ-ни Экономика айнытыу, Табийгъат эм Финансла министерстволары Шимал-Кавказ федерал округну эм Кавказ.РФ биригиуню келечилери бла бирге  жарашдырадыла.  

Андан сора да, Шимал Кавказны регионларына тири айныргъа боллукъ бёлюмледен бирине гюллени ёсдюрюу белгиленнгенди. Бу жаны бла инвестиция башламчылыкълагъа да, къыралны жанындан болушлукъ бериллигине да къаралгъанды.  

РФ-ни Правительствосуну Председатели Шимал Кавказ федерал округну оноучуларына РФ-ни Жарыкъландырыу министерствосу эм РФ-ни Экономика айнытыу министерствосу бла бирге 1 сентябрьге дери орта профессионал билим бериуню комплексли айнытыу бла байламлы программаны хазырларгъа эм къабыл этерге буюргъанды. Аны магъанасы-регионлада урунуу рынокну квалификациялары бийик болгъан ишчиле бла жалчытыргъады, деп айтылады билдириуде.